Omulumentu gwomimvo 18 okwa mangwa po kopolisi moshitopolwa shaShikoto sho anuwa a kwata koonkondo okanona kokakadhona komimvo heyali.
Sha ikolelela komukuluntu gwopolisi moshitopolwa shaShikoto Teopoline-Kalompo Nashikaku okwa ti oshiningwanima shoka osha holoka momudhingoloko gwaMuntele mehuliloshiwike.
Otaku hokololwa kutya nakufekelwa moshiningwanima shika okwa li a thigwa megumbo naanona mboka yaali, okamati nokakadhona. Omulumentu ngoka anuwa okwa li a kwata okanona hoka kokadhona koonkondo omanga ye li mo oye ayeke megumbo. Otaku hokololwa kutya omulumentu ngoka ina pambathana nokanona hoka, ihe okwa li omuniilonga. Opolisi oya kala nokukumagindha aakuluntu momagumbo kaaya kale we taya thigi aanona aashona miikaha yaalumentu. Omakwato koonkondo ohaga ningwa olundji kaantu ye li popepi. Aaniilonga momagumbo oshowo aapambele yaalumentu itaya inekelwa we okuthigwa naanona aashona. Opolisi oya kumagidha oshigwana aluhe shi kale tashi lopota iiningwanima mbika uuna tayi holoka.
Tayi ti, kehe ngoka taka longa iilonga mbyoka na lopotwe, ihe hakugamena omolwa anuwa sha ningwa komupambele. Moshiningwanima inaasanuwaathana, omukulupe gwomimvo 62 okwa si eso lyombaadhilila sho kwa li a adhika komutekulu gwe nomatutu komulungu.
Opolisi oya ti oshiningwanima shoka osha holoka momukunda Oshana momudhingoloko Okatope.
Otaku hokololwa kutya okatekulu hoka kokamati oka li ke ya megumbo ihe inaka adha mo yinakulu.
Shoka anuwa okwa li she ka limbilike sigo ka tameke okukonga yinakula, ngoka a li e mu adha pooha dhondjila a lala nomatutu komulungu.
Otaku hokololwa kutya kape na omuntu ta fekelelwa meso lyomukulupe ngoka.
Omulumentu ngoka a li ta kongwa kopolisi omolwedhipago lyomulumentu gwedhina Patrick Hamupanda ngoka a li a dhipagwa kongundu yaalumentu yahamano omasiku ga yi koWindhoek, okwi igandja kopolisi. Omupopiliko gwopolisi moshilongo Kauna Shikwambi okwa lombwele iikundaneki kutya omulumentu ngoka kwa li ta kongwa kopolisi okwi igandja miikaha yopolisi ongula yOmaandaha.
Okwa patululilwa oshipotha shedhipago, nayakwawo mboka ya kwatwa oshiwike sha zi ko oya li ya tindilwa eyifutilemo omolwuunnene woshipotha.
vkaapanda@nepc.com.na