Omupolisi gwomulumentu koshitopolwa shaKavango shokuuninginino ota tumbalekelwa iilonga ye yuufule sho a li a yambidhidha omukiintu okupulumuthila ohanona ye popate mpoka a li e li ta kambadhala okulefa a ye koshipangelo.

Sha ikolelela kuInspekta Raimbert Muronga, oshiningwanima shoka osha holoka Osoondaha momukunda Mpoto.

Otaku hokololwa Warrant Officer Joel Hamukoto, a li ta zi peinda lyopolisi poNamasira u uka kOmpungu, a ka talele omeya aapolisi mboka haya longo pamwe naye, sho a mono omukiintu e li pooha dhopate e na okanona ka adhika taka piti nale. Hamukoto anuwa okwa yambidhidha omukiintu nguka, nokonima okwa yi pokapangelo okashona ta zi po nomupangi ngoka a adha ohanona ya valwa nale.

Omukiintu ngoka nohanona oya falwa koshipangelo noye li monkalo ombwaanawa.  Moshiningwanima inaashi faathana, opolisi moshitopolwa shaZambezi oyi li molukongo lwaafuthi yaali mboka anuwa ya ponokele omupangi nomukeeleli gomaliko omanga ya li miilonga.

Sha ikolela kolopota yiiningwanima mbyoka ya holoka mehuliloshiwike,  oshiningwanima osha holoka pokapangelo okashona taka ithanwa Lisikiki koZambezi lwopotundi 01h00. . Otaku hokololwa kutya aalumentu mboka yaali oya yi pokapangelo mpoka taya pula ya kwathelwe oshoka anuwa gumwe okwa lika keyoka.

Oshoka omukeeleli gwomaliko nomupanga kayena ontseyo kutya otaya dhanwa momitse, anuwa oyeendelela okugandja omayakulo.

Aalumentu mboka anuwa okwali ya kutha ondjembo noku ya pula iimaliwa ayihe yena noongodhi dhawo dho peke,

Okwa lopotwa kutya oya yi noshimaliwa shi thike N$880, omanga oongodhi ya yi nadho dhongushu N$6 400.

- vkaapanda@nepc.com.na