“Inandi hangika mo meumbo pefimbo Ndalila ta denge inakulu, omushamane wange okwa ninga epuko lakula eshi a kwata okavidio pefimbo Ndalila ta denge inakulu. Omushamane wange okwa li a wana okuya pokati kaNdalila nainakulu opo e va hangakunune vehe lidenge.”

Aa omatumbulo aKalista Koti ou eli oye omudali waNdalila ta hokolola nghee a uda nai eshi omushamane waye a ninga oshinima shi sifa oshoni eshi a kufa okaana kaye meumbo opo ka ka homone inakulu fiyo ka denge omukulupe weedula 70.

Koti eshi a ninga eenghundafana naKundana okwa hokolola ta ti omusamane waye okwa  ninga epuko linene eshi a ninga okavidio pefimbo Ndalila ta denge inakulu shaashi okavidio oka eta oinima ihapu ii.

“Ame onda hangika nda ya kOshakati nda ka landa oinima yaNdalila yokofikola Etitano, ashike omusamane wange ina lombwela nge ngeenge ope na oudjuu pokati kaNdalila nainakulu,” Koti ta ti.

Okwa ti okwa ka dengelwa ashike ongodi kuNdalila kutya okwa lumatwa kuinakulu eshi kwa li tave lidenge moipafi yaxe.

“Ohandi vele ombedi omusamane wange shaashi eshi a ninga oshififa ohoni neenghono. Ita dulu okukala a tala ina ta dengwa kokaana kaye mwene e ka dala manga yee e li omutumba koshipundi ta kwata okavidio ta ti kutya Ndalila na dipaye ashike inakulu,” Koti ta hokolola.

Okwa ti okwa uda nayi unene eshi okaana kaye ka kwatwa po shaashi eshi otashi etele Ndalila omupya eshi a ya modolongo peedula dishona.

“Opo ashike nda hangika nda futa ofikola yaNdalila opo a dule a ka endulule oilongwa yaye, ndele paife okaana kange oka kwatwa po nale,” Kiito ta hokolola.

Koti okwa hokololela Kundana ta ti omukulupe oha dengwa noshito kovatekulu vaye vomeumbo laye eshi omudo wa dja ko omulumenhu ha di meumbo lomukulupe okwa li a mangwa po konima eshi a denga omukulupe tuu oo.

Okwa hokolola ta ti Ndalila naye okwa ninga epuko lakula eshi a tula inakulu koshi ndele te mu denge moiti yeumbo shaashi osha puka neenghono.

“Ndalila ova kala ve na ombili nainakulu shito, eshi oshikando shotete Ndalila tave lidenge nainakulu. Ngeenge omukulupe ta dengwa kovatekulu vaye meumbo Ndalila oye ha ka amena inakulu shito,” Koti ta hokolola.

Okwa ti okwa hala Ndalila a dja mo modolongo opo e uye a pe inakulu ombili nokukala yoo vali a twikila nofikola yaye.

Ndalila  oku na eedula 19, nokwa kwatwa po Osoondaxa peumbo lavo momukunda Oshuungu moshitukulwa shaMusati konima eshi vati a denga inakulu Etitano efimbo longula. Xe yaNdalila, Vitalis Mweshininga, eshi naye a ninga eenghundafana naKundana Omaandaxa okwa ti ote livele ombedi eshi a kufa okavidio pefimbo Ndalila tave lidenge nainakulu shaashi paife oka eta oinima ihapu ii noutondwe mepata lavo

“Elalakano lokavidio okutumina ofamili yomukulukadi wange opo i tale Ndalila eshi ta denge inakulu. Konima eshi nda tumina ovakwapata vomukulukadi wange okavidio ove ka yandjeneka omoshiwana fiyo ta ka monika kovanhu vahapu,” Mweshininga ta ti. Mweshininga okwa ti paife kave na ombili vali numukulukadi waye meumbo shaashi omukulukadi okwa handuka eshi okaana kaye ka kwatwa po.

“Onda hala Ndalila wange a ukila keumbo opo eu ye aye kofikola shaashi okwa hangika nale e lishangifa ofikola. Onghee ohatu ka kala omutumba omadimo avali opo tu dule okukandula po omukundu ou paife shaashi kasha li mondjila eshi okaana ketu kashona ke li modoolongo,” Mweshininga ta ti. fhamalwa@nepc.com.na