Ovakalimo vomoshitukulwa shaMusati otava ka kala ovo votete okukala ve na eteyo lakula lomandjebele monooli aishe.

Omandjebele vati okwa kunwa lotete ketunda, nokwa teelelika ku ka kale ku na eteyo lopambelewa komafiku okomesho.

Ngoloneya woshitukulwa Erginus Endjala okwa tumbula kutya, okwa hafela eteyo lomandjebele olo tali kaningwa komesho yomafiku shaashi vati otali ka yandja eemhito doilonga kuvahapu.

Okwa ti yoo otashi ka nenepeka eliko loshitukulwa shaashi ovanhu vahapu okwe lineekela otava ka kala tava talele po Etunda, voo vahapu tave ya okulanda unene tuu ava ve li konooli.  Omukalimo umwe womoshitukulwa shaMusati omunangeshefa Loide Simon okwa ti, okuwete nokuli efiku leyeululo lopambelwa la fa tali ende kashona shaashi voo ova fila omandjebele omOwambo ondjala.

“Okumona omandjebele oshakala oshiima shidjuu neenghono shaashi  shito ohatu mono ashike omandjebele okudilila koNoordoewer, Aussenkehr, Komsberg oshoyo koNaute Dam,” Simon ta ti.

Ota ti vati osha kala yoo vali shidjuu neenghono kuvo shaashi vati eenhele odi lili kokule, shoo vali oshi na ondilo oku ka teka.

Nokuli omafimbo amwe vati omandjele ohaa kala e na ondilo unene.

Okwa tii yoo kutya ngeenge nee tava teke omandjebele peedoolopa dopopepi natango otashi kala shi na ondilo efimbo limwe, shaashi ohama dulu okukala inaa landwa po diva, ndele taa ningi nai.

“Paife ngaha omunhu oto i ashike u ka lande popepi pEtunda opo ove owa aluka osho. 

Omunhu natango oho lande ashike ostoka ya eleka shaashi omandjebele oku li popepi, woo shima a pu po, ove to ka tala vali natango,” Simon ta yelifa.