Kansela gwoshikandjohogololo shaShikuku, Mathew Gabriel okwa ti ota pandula aanyasha oshowo aakalimo moshitopolwa shaMusati sho taya dhana onkandangala ombwaanawa muunafaalama, nonando ya taalela omashongo galwe. 

“Ngele owa tala kooha dhopate akuhe hoka, oto mono iikunino yiikwamboga ya yooloka, shoka tashi ulike kutya oyendji oya kutha ombinga noya itula mo,” ta ti ngaaka.   Ta ti, uuministeli wuunamapya owa pumbwa okwiidhopa mo opo wu yambidhidhe aanafaalama, unene kombinga yoombuto oshowo omiti dhokudhipaga iipuka tayi hanagula po iikwamboga.  Gabriel okwa ti omiti odha ninga ondilo, ihe opo oshikunino shi hupe, owu na okukala wa landa omiti ndhoka. Selma Shekutaamba a yambukile momukunda Oshitutuma okwa ti uunafaalama owe mu kutha moluhepo. 

Shekutaamba oku na oshikuninino shiikwamboga, oshowo oshikuku shoondjuhwa.  

“Oshikunino shandje onde shi tameke omimvo ndatu dha piti, ihe sigo oompaka otashi ende nawa,” Shekutaamba ta ti ngaaka.  Ta ti, kasha li oshipu okuya po noshikunino, ihe okwa kondjo a mana mo, oku shi kaleka po nonando a tsakaneke mo omashongo ga yooloka. 

“Oshikunino opo wu shi kaleke po owu na okukala omunankondo oshowo omwiifupupiki, oshoka ngele oho sholola mbala ito shi pondola,” ta ti ngaaka.

Shekutaamba moshikunino she oku na mo  iikwamboga ngaashi omatama, oonyanga, oomboga dhomaludhi, uunawamundesha nosho tuu. 

Ta popi ta ti ota dhimbulukwa omumvo gwa yi sho omatama ge ga ponekelwa kokambaambala hoka ka li ke ga hanagula po agehe.  

“Okonyala kwa li ndi sholole oshoka omatama gandje okwa li ogendji, nokwa li nda yalula okumona mo oshimaliwa shi thike N$30 000, ihe inamu za nando osenda yimwe,” ta po pi ngaaka.

Shekutaamba ta ti, okwa li a pululula mbala, e ta  tamukulula, ihe ethimbo ndika okwa li a kondjo nokusinda okambaambala nomiti a li a longitha. 

Ta gwedha po ta ti, ngashiingeyi oshikunino she ohashi vulu oku mu etela oshimaliwa sha gwana okuyambidhidha aakwanezimo ye oshowo okukandula po omaupyakadhi ga yooloka. 

Ta ti, okwa kuta aaniilonga yane mboka haya longo moshikunino she.

Shekutaamba okwa ti oshikuku she shoondjuhwa okwa tameke nasho mo2019, nuuyuhwena 20, ihe nena ota ti, oku na oondjuhwa 300 moshikuku she. 

Ta ti, oondjuhwa dhi li 80 okwe dhi landitha mo oshiwike sha zi ko.  

Ta popi ta ti ngaashi ethimbo ndika lyiituthi oondjuhwa ohadhi landwa nawa. 

“Otandi kumagidha aanyasha ya thikame nena, ee taya ka nyangadhala naashoka taya vulu. 

Omutumba ethete, oshimaliwa ihashi iyeta shoshene, ihe ohashi kongwa,” ta ti ngaaka. -vkaapanda@nepc.com.na