Nonando oyendji ya kala ye na uumbanda kutya omvula nuumvo itayi loko mbala monooli, okuza oshiwike sha zi ko shiyenga okwe ga tilehi pevi, miitopolwa oyindji yomonooli. 

Kundana sho a li a talele po iitopolwa ya yooloka ngaashi Ohangwena, Omusati nOshana omvula oya loko nawa miitopolwa moka, shoka shi li oshinima oshiwanawa koyendji oshowo kiimuna. 

Asteria Akuuno gwomomukuna Epya Eshona moshikandjohogololo Okatana okwa ti nonando omvula ya loka kwa toka natango oyena omukumo goku longa omapya gawo. 

“Omvula oya penduka tayi loko ohela, onkene onda longitha omata gotango okupulula epya lyandje oshoka okwa toka nale, inandi hala okumana po ethimbo ishewe,’’ ta popi ngaaka. 

Ta ti, shito ngethimbo ndika, ngeno otaya helele nale omapya gawo, kombinga yomukaga ngeno kaye gushi nando. 

“Otatu pandula komuloka omwaanawa, nondu uvu natango kutya iitopolwa oyindji oya mona omuloka omwaanawa,’’ ta pandula ngaaka. 

Maria Shikongo, a yambukile momukunda Othingo okwa ti, omvula oya loko okuza ongula yEtiyali awuhe sigo ongula yEtitatu, ihe natango iikogo otayi gandja omukumo. 

“Omvula oya loka nawa noya li ya sheka lwopotundi 10h00 lwaampoka Etitatu. 

Ngele oya lala natango itaayi loko, elago oshoka egulu olya luudha nawa, tali ulike okuza omuloka natango,” Shikongo ta popi ngaaka. 

Shikongo ta ti, evi ngashingeyi olya nyuta nawa, nota longekidha nale okupululitha eepya lye opo iilonga yetemo yi tameke kuyele. 

Ta ti, omimvo dha piti, oya kala haya thiki mokili yena iilya momapya. 

“Nuumvo onda hala okulima Iilya no makunde, oshowo oofukwa dhandje odhindji, opo ndi vule okukalanditha omvula ta yiya, ndimone wo oshimaliwa shoku landa omboloto,” Shikongo ta ti. 

Shikongo okwakumagidha aanafalama akwawo, ya tsikile okugalikana pamwe opo yamone omolokwa omwanawa nuumvo ya vule okulonga nawa momapya gawo. 

Saara Shoolongela gomomukunda Onaushe moshitopolwa shaMusati okwa ti, nonando omvula ya loko nawa omata gotango, okwa tegelela natango olweetho olutitatu opo a vule okulonga epya lye. 

“Ondina uutile natango, oshoka omvula ohayi ya nawa petameko etayi ka hula ishewe, shoka hashi hepitha oonkondo niimaliwa yetu, uuna iilya ya kukuta noku sa po,”ta fatulula ngaaka. 

Ta ti, nonando omvula inayi loka lela ngaashi shito, iishana oyina omeya, nomwiidhi ogwa ziza nawa. 

Iitopolwa yimwe yoshilongo otayi hokololwa nayo ya mona omvula nonando ohayi pitithapo omasiku omanga omvula inaayi tsikila okuloka natango. 

Unene iitopolwa yokUumbugantu oshowo kUumbugantu woshilongo. 

Nonando kiitopolwa hoka ihaku limwa omapya, nayo otaya pumbwa wo omvula molwa iimuna yawo moka omo haya hupu, okulya omwiidhi vkaapanda@nepc.com.na