Elelelo lyondoolopa yaNdangwa mehuulilo shiwike olya li lya kutha onkatu opo li opaleke omikanka noombululu dhoku kunguluka omeya, ndhoka dha thitikwa kiiyagaya myoka hayi imbi omeya ga pite nawa.

Omugandji gwomauyelele melelo lyondoolopa yaNdangwa Petrina Shitalangaho-Mutikisha okwa ti, otaya opaleke uukanka opo omeya ga piti ga manguluka.

“Ndika ethimbo lyomvula, nongele oondjila ndhomeya itadhi thitululwa omeya otaga talama nokukakeka ondoolopa,’’ ta fatulula ngaaka.

Ta ti, oya li ya tameke okuthitulula uukanka wondoolopa omumvo gwayi muDesemba.

Shitalangaho-Mutikisha natango okwa li a kumagidha oshigwana kaashi umbile iiyagaya we momikanka dhomeya, oshoka otadhi thiti.

“Natu kalekeni ondoolopa yetu ya yela. Oku ekelahi iiyagaya kehe mpoka ohaku gandja iilonga yagwedhwapo, no hashi gandja ethano lyondoolopa ewinayi,’’ ta popi ngaaka.

Omimvo dha piti elelo lyondoolopa olya kala noku opaleke ondoolopa ayihe koonono.

Omumvo gwa ziko pethimbo ondoolopa kwali tayi opalekwa, Mayola gwondoolopa Paavo Amwele, okwa li a kunkilile aakalimo ya kale aluhe ya tula uuyogoki komeho.

Ta ti, ondoolopa ohayi kala yili pamuthika omwanawa ngele ya opala no ya yela, ihe shoka oshina okukalekwapo kaakalimo.

“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo ku yandwe omikithi tadhi vulu okupitila moongaga,” ta popi ngaaka.

Ta kumagidha oshigwana shaNdangwa kutya, nashi kale sha tula uuyogoki komeho.

“Ondi inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka.

Amwele okwa ti, esiku ndyoka inali kala olyo tali opalekitha aakwashigwana, ihe nashi kale onkalondjigilile noshi holelwa sho ku opaleka.

 Ta gwedha po ta ti, okwa li anyanyukilwa aakalimo yomOndangwa sho ya li ya kutha ombinga oku opaleka ondoolopa yawo.

-vkaapanda@nepc.com.na