Kansela woshikandjohoololo shaShikuku Matheus Gabriel ota hokolola eendongi domoshikandjohoololo shaye tadi li ovanhu noikombwena pomukunda Oshindete.

Okwa popya mOmaandaxa ta ti momukunda Oshindete omwa lopotwa ondoongi ya lya po okakombwena akeshe, omanga kamwe oka lemanekwa efimbo lomutenya momukunda, moshikutulwa shaMusati.

Kansela okwa hokolola ta ti ondoongi oya tameka tai taataya oingulu, neembwa, noikombo ya li mepya, nokonima oya ka ya koukombwena ava kwa li ve li koshi yomuti ndele ta i va ponokela fiyo tai lemaneke kamwe omanga kamwe oye ka lya po filufilu akeshe.

 Gabriel okwa ti oshinangwanima eshi osha limbilika ovakwashiwana vopomudingonoko opo shaashi paife ove li ashike moumbada kutya pamwe ounona vavo navo otava longelwa oushada keendoongi. Kansela okwa ti omudo wa dja ko momukunda Oshindete natango okwa li mwa lopotwa mu na omunhu a lemanekwa kondoongi kwa li a teka mokaulu kaye kamwe.

Okwa ti omulumenhu oo, oku li momwenyo natango ashike oku na oulema komaulu shaashi oha ende ta shongola paife. Gabriel okwa ti omudo 2013 kOgongo nako okwa li ku na omukainhu natango kwa li a ponokelwa kondoongi fiyo ta lamanekwa, ashike paife oku li monghalo iwa. Gabriel okwa ti ombelewa oya shiivifila ovanambelewa hava longo noimuna, opo va ninge omakonakono e li kombinga yeendongi edi.

Okwa ti efiku olo ondoongi ya lya po okakombwena oya dipawa kopolifi ndele tai tetwa omutwe, wa twalwa kovanambelewa hava longo noimuna opo u ka ningilwe omakonakono. “Mopaife ngaha ovanambelewa ove lipyakadila tava konaakona omutwe wondoongi opo va mone ngeenge pamwe ondoongi ei, oya kwatwa keemwengu,” Gabriel ta ti.

Okwa ti ngeenge ovanambelewa ova mono kutya ondongi oi na oshidu sheemwengu nena eendoongi adishe otadi ka kala da tunhilwa omukifi weemwengu pomudingonoko opo.

Okwa kunghulila oshiwana shopomudingonoko opo shi kale shi li kokule neendoongi shaashi oda nyika oshiponga paife. – fhamalwa@nepc.com.na