Eshi kwa ninga omafiku kuhe na omeva komikunda dimwepo, ovakalimo momukunda Ondulu moshikandjahoololo Uuvudhiya ova ti paife omeva okwa luka konima eshi va ninga oivike ivali vehe omeva momukunda wavo.
Pefimbo Kundana a talela po onhele opo ha pa nwefa oimuna kovanhu, ova hokolola tava ti ova kala ve li momhumbwe ya kula yomeva apata eshi va kala tava dengwa kenota noimuna yavo.
Thomas Shanyengange oku li omukalimo womomukunda Ondulu, okwa ti paife okwa hafa shaashi omeva okwa luka eshi paife ta dulu okumwefa eengobe daye efiku keshe.
Shanyengange okwa ti onhele ei oyo ashike ili pomudingonoko wavo hai longifwa kovakwashiwana aveshe eshi ovanhu vamwe ohave ende eendjiladiledile tave u ya okumwefa oimununa yavo ponhele opo.
“Otwa pandula eshi omeva ma luka paife, oimuna yetu okwa li tai dengwa kenota shaashi ka kwali pena omeva eengobe onghee eshi osha kala eshongo linene ku fye,” Shanyengange ta ti.
Paulina Deotor naye okuli omukalimo womomukunda Ondulu nokwahokola ta ti neudo ina ku lokwa nawa eshi oilya yavo momapya tai fi po shaashi kakuna sha odula komidingonoko davo.
“Ovanhu vamwe ina tameka okulima omanga vamwe okwa li valima ndele tava xulifa po okutwikile okulima shaashi kakuna sha odula,” Deotor ta ti.
Okwa ti ngeenge odula ina i loka itava ka teya mo sha momapya avo, yoo noimuna yavo otai fi kondjala onghee ove na oumbada woshikukuta neudo.
Okwa hokolola ta ti eshongo lomeva olo unene omukundu wa kula tau dana onghandangala momukunda wavo eshi omeva a madulu okutapata efimbo lile.
Deotor okwa indila ouministeli wounamapya opo u kale tau yandjaneke eepomba dihapu peenhele dokunwefa oimuna shaashi paife opomba ei ili pomukunda wavo oha pa kala pehadi oufita woimuimuna efimbo keshe eshi ovanhu have u ya momwaalu muhapu okunwefa oimuna.