ONAMBANGO - Omukwaniilwa gwOndonga Fillemon Shuumbwa Nangolo okwa ti oongeleka ndhoka tadhi pukitha oshigwana nadhi yiwe moshipala.

“Oongeleka dhimwe dhoka tadhi totwa otadhi pukitha oshigwana, onkene onda hala aaleli ayehe opamwe nopolisi opo tu mangeni uukumwe, ee tatu dhi yi moshipala,’’ ta kumagidha ngaaka. Ta ti, oshigwana otashi pukithwa, ihe kashi shi wete, tashi yugwa iimaliwa oshowo omaliko gawo nomukalo omwaanawa, ihe osha posipala. Ta gwedha po ta ti, omumvo nguka okwa hala uupyakadhi hau etwa koongeleka wu hule po.

“Omasiku ga zi ko onda li nda lopotelwa aantu omathele ya ngundumana, anuwa oya tegelela Jesus e li mombetsa ta zi koWindhoek, te ya e ya galikanene,” ta hokolola ngaaka.

Ta popi ta ti kehe gumwe okwa li a pulwa N$150 a ka landelwe efaila lyoombapila opo lyi ye lyi galikanenwe kuJesus ta zi koWindhoek, nuuna anuwa taya ka ninga omaindilo giilonga otaya thikile ashike taya taambwa.

 “Oongeleka dhika otadhi endelele unene, otadhi pukitha oshigwana onkene nadhi kuthilwe onkatu,” ta popi ngaaka.

Ta ti, kehe ngoka ta ka kala e na ongeleka na kale a pewa epitikilo okuza kehangano lyi lile po oongeleka, kungoloneya, kansela oshowo kumwene gwomukunda.

Omukuluntu gwopolisi moshitopolwa shaShana Naftal Lungameni Sakaria naye okwa li a thindi omuthindo kutya oongeleka ndhoka otadhi teyagula po ombili momagumbo.

“Oongeleka ndhoka otadhi teya gula po omakwatathano gaakwanezimo oshowo gookuume sho taya lombwelwa kutya otaya lyaathana,” ta nyenyeta ngaaka.

Ta ti oye na iipotha inayi pwa okupangulwa ihe uupyakadhi owa etwa koongeleka. Ta pula kutya ongiini nyoko e ku vala to lombwelwa kutya ote ku li, ihe oto shi itaala.

“Oongeleka ndhoka otadhi pukitha oshigwana noonkondo, notadhi kanithitha ombili momagumbo,” ta popi ngaaka. – vkaapanda@nepc.com.na