Omalutu goohanona opo dha valwa oga itsuwa momatoto giiyagaya ga yooloka mesiku limwe, kaanilonga yokwoopaleka mondoolopa momundhingoloko gwaWalvis Bay.

Opolisi moshitopolwa shErongo oya ti olutu lwohanona olwa itsuwa metoto lyiiyagaya Omaandaha pethimbo lyoshitumbetango, lwopotundi 10h00.

Otaku hokololwa kutya omuniilonga gumwe gwamuni okwa li i itsu molutu lwohanona pethimbo kwa li ta pimpi endolama lyiiyagaya.

Okwa li i ithana aaniilonga pamwe naye ye mu talithe, mboka konima ya li ya dhengele opolisi.

Opwa piti ashike oowili mbali Omandaaha ngoka, natango omuniilonga gumwe gwamuni  anuwa natango a mono olutu lwohanona melambo lyokandjugo.

Kape na ngoka a mangwa po shi na sha niiningwanima ayihe iyali.

Opolisi otayi indile moshigwana kehe ngoka e na uuyelele kombinga yiiningwanima mbyoka opo a lopotele opolisi yi li popepi nenge a dhenge koonomola 081 443 3377, nenge 081 246 4757.

Aaleli oshowo uuministeli wuukashikekookantu owa kala nokukumagidha aakiintu kombinga yaashoka ye na okuninga uuna kaaye na ohokwe noohanona dhawo nenge uuna ya iyadha momategelelo inaaga longekidhwa.

Iikundaneki oya kala nokutseyithila oshigwana nkene shi na okuninga, oshowo mpoka shi na okuthiga oohanona pehala lyoku dhi dhipaga nenge oku dhi ekelahi momatoto.

Oshigwana osha kumagidhwa aluhe shi kale tashi thigi oohanona pomahala ga gamenwa, ngaashi piipangelo nopoosasiona dhopolisi oshowo poongeleka. 

Ohamba yaUkwanyama Martha Mwadinomho yaKristian Nelumbu, okwa li a indile omukiintu kehe e na okanona inee ka hala opo e ka fale kuuhamba.

Ta ti uuna gumwe ta ka thiga ohanona pomahala ngoka, itaka pulwa omapulo gasha ye ita mangwa po, ihe ohanona otayi tambulwa ko ashike.

– vkaapanda@nepc.com.na