Oohanona mbali adhihe dhi na omwedhi gumwe, odha si omaso gombaadhilila moshitopolwa shaShana momindhingoloko dha yooloka.

Sha ikolelela komugandji gomauyelele gwopolisi moshitopolwa shaShana Thomas Aiyambo, ohanona ya tseyika nedhina Justine Tulipoima Kadhikwa okwa li ya hulitha pethimbo ya li ya kotha.

Oshiningwanima shoka osha holoka molukanda Uupindi momundhingoloko gwondoolopa yaShakati.

Otaku hokololwa kutya ohanona ndjoka okwa li ya lala pamwe nayina.

Opolisi oya ti, yina anuwa okwa li a yamutha ohanona ye lwahugunina po03h00, ihe sho a penduka po05h00, ohanona kakwa li tayi inyenge.

Opolisi oyi li metifa natango okukonakona shoka sha etitha lela eso lyohanona ndjoka.

Okwa lopotwa kutya ohanona ndjoka kakwa li yi na uuvu washa.

Moshiningwanima sha faathana ohanona yedhina Victoria Namawe okwa si eso lyombaadhilila mehuliloshiwike.

Aiyambo okwa ti, oshiningwanima osha holoka mondoolopa yaNgwediva.

Otaku hokololwa kutya ohanona ndjoka okwa li ya falwa koshipangelo esiku olyo tuu ndyoka nokwa li ya hulithile megumbo konima yethimbo efupi ya li ya thiki megumbo.

Opolisi oya kumagidha oomeme ya kale aluhe taya sile oohanona oshimpwiyu, unene mboka ye li kohi yomvula yimwe.

Ta yi ti, aavali naya kale aluhe taya kondololola oohanona ethimbo alihe, oshowo okwiikaleka kokule niikolwitha. 

Iiwike ya zi ko natango opolisi moshitopolwa shaMusati oya lopota ohanona yomwedhi ya sile mondhikwa yayina.

vkaapanda@nepc.com.na