Opolisi moshitopolwa shaMusati otayi kumagidha oshigwana shi kale tashi sile oohanona oshimpwiyu ethimbo alihe, unene tuu ngele dhi li moondhikwa.
Oya ti oya ndhindhilike iiningwanima yoohanona tadhi sile mondhikwa tayi indjipala.
Omupehakuluntu gwopolosi moshitopolwa shaMusati Moses Simaho okwa ti, iiningwanima mbyoka oya lopotwa tayi holoka unene koohanona dhi li kohi yoomwendhi ndatu.
Ta ti, mboka haya kala noohanona momagumbo nenge ooyina naya kale aluhe taya tala aanona kehe ethimbo ngele oye li nawa moondhikwa nenge poombete. “Oohanona ihadhi popi, onkene nonando odha nyengwa okufudha, ito dhi uvu shapo ongele owala ya lili, ngele hasho otayi huulile muunyengwi,” ta popi ngaaka. Ta gwedha po ta ti, osha simana aluhe oohanona dhi kale tadhi silwa oshimpwiyu.
Moshiningwanima oshipeepeka, ohanona yomwedhi gumwe oya li ya sile mondhikwa yayinakulu, momukunda Okakukamunongoni momidhingoloko gwaEtayi.
Ohanona oya tseyika nedhina Penda Batromeus Oscar.
Omwedhi gwa yi, oohanona mbali adhihe dhi na omwedhi gumwe, odha si omaso gombaadhilila moshitopolwa shaShana momindhingoloko dha yooloka.
Sha ikolelela komugandji gomauyelele gwopolisi moshitopolwa shaShana Thomas Aiyambo, ohanona ya tseyika nedhina Justine Tulipoima Kadhikwa okwa li ya hulitha pethimbo ya li ya kotha nayina.
Oshiningwanima shoka osha holoka molukanda Uupindi momundhingoloko gwondoolopa yaShakati.
Opolisi oya ti, yina anuwa okwa li a yamutha ohanona ye lwahugunina po03h00, ihe sho a penduka po05h00, ohanona kakwa li tayi inyenge. Ohanona ndjoka anuwa kakwa li yi na uuvu washa.
Moshiningwanima sha faathana, okahanona Victoria Namawe komOngwediva, oka si eso lyombaadhilila omwedhi gwa yi.
Otaku hokololwa kutya ohanona ndjoka okwa li ya falwa koshipangelo esiku olyo tuu ndyoka nokwa li ya hulithile megumbo konima yethimbo efupi ya li ya thiki megumbo.
Iiwike ya zi ko natango opolisi moshitopolwa shaMusati oya lopota ohanona yoomwedhi ya sile mondhikwa yayina. Shika osha ningwilwa momukunda Olupandu moshikandjohogololo shaEtayi.
Otaku hokololwa kutya yina yokanona okwa li a pe okanona otyepisa ya kangwa, omanga ke li mondhikwa. Okanona hoka anuwa okwa li ka tameke okukolola sigo ka mwena.
Otaku hokololwa kutya okanona kakwa li taka inyenge sho te ka ithana, shoka shali she mu halutha ee ta tondokele mbala kokapangelo ke li popepi.
Sho anuwa a li a thiki pokapangelo Olupandu, okwa li a tseyithilwa kutya okanona oka hulitha.
vkaapanda@nepc.com.na