Ngaashi sha kala onkalo ndjigilile okundhimbulukwa nokutyapula esiku lyaalongi kehe omasiku 05 gaKotomba omumvo kehe, nonuumvo esiku ndyoka otali ka ndhimbulukiwa oshilongo ashihe.
Omunambelewa omukuluntu gwelongo Sanet Steenkamp okwa shanga komalungula kutya oosikola otadhi ka pata okuza momasiku 1-5 lyaKotomba, tadhi ka patuluka momasiku 06 gaKotomba.
“Otwa tula po okafudho okafupi komasiku ngoka gatano, opo tu gandje ompito kaalongi ya tyapule esiku lyawo nombili, nohole, osho wo moshili nomomukalo omwaanawa,” a nyola ngaaka.
Ta ti, aalongi oye na okusimanekwa nokupandulwa sho ya kala yi itula mo okugwanitha po iilonga yawo, nonando ya kala mokati komukithi gu nyanyaleka ngoka gwa li gwa ponokele uuyuni awuhe, Covid-19.
Esiku ndyoka olya kala ha li ndhimbulukiwa aluhe okuza mo mumvo 1994, mekwatelokomeho lyehangano Unesco.
Shoka okwa li sha ningwa nelalakano lyokukongela aalongi omayambindhidho noku shilipaleka kutya aalongi oya gwanitha po oompumbwe dhomapipi tage ya.
Esiku ndika olya ndhindhilikwa wo ha li tyapulwa nokundhndhilikwa onga esiku lyaalongi uuyuni awuhe, onkene olyi na okusimanekwa. Omukuluntu gwelongo moshitopolwa shaShana Hileni Amukana okwa ti, esiku ndyoka ota li ka tyapulwa kaalongi ayehe moshilongo okuya pa ompito okusimaneka esiku lyawo.
“Okafudho hoka komasiku gatano, oka nuninwa aalongi opamwe naalongwa yawo, onkene omasiku ngoka otaya ka kalekwa komagumbo,” ta fatulula ngaaka.
Omulongisikola gumwe ngoka edhina lye lyi shiwike kuKundana okwa ti aalongisikola oya simana monkalamwenyo.
“Aalongi oye lile po okugandja uunongo wawo kaalongwa, ihe ohashi pula oshindji oku uvitha ko omulongwa a kale a taamba ko shoka ta longwa, oshowo okukwashilipaleka kutya oto gwanitha po iilonga yoye,” ta popi ngaaka. Ta fatulula ta ti, elongo oshitopolwa shonkalamwenyo.
“Onkalamwenyo yomuntu ohayi longekidhwa kelongo,” ta popi ngaaka.
Ta gwedha po ta ti, aalongi oye na okusimanekwa oshoka oyo haya xwaxwameke onkalamwenyo yomuntu monakuyiwa.
Ta gandja oshiholelwa ta ti, aantu mboka inaya mona elongo, oye li momapandaanda omanga mboka ya mona elongo lyi ihwa po, ye li moombelewa noye na iilonga iiwanawa.
– vkaapanda@nepc.com.na