Festus Hamalwa
Elelo lodoolopa yaEenhana otali ka yandja ehandu loshimaliwa koovene voimuna tai ka hangika ili mEenhana, meni lodoolopa. Edi oda popiwa komupopiliko wodoolopa oyo Paul Shilongo pefimbo a ninga eenghundafana naKundana Etitatu. Shilongo okwa hokolola ta ti elelo lodoolopa yaEenhana otalika kwata po oimuna aishe tai kahangika ili meni lodoolopa efimbo keshe.
Ta ti elelo lodoolopa ola didilika omwaalu muhapu woimuna ngaashi eendongi, eengobe, noikombo hai kala ashike tai nape moodolopa efiku keshe.
Okwa ti oshiwana oshali okulondwela opo shi kale sha kotokela oimuna yasho ndele ovanhu vahapu inava hala oku li ufa komalandulafano odoolopa. Eshi osha eta opo elelo li kwata noku idilila oimuna aishe tai ka hangika tai ende modoolopa.
“Otuna oshiunda shoimuna sha kula, omo hatu ka patela mo oimuna aishe tai ka kwatwa ko kumuni,” Shilongo ta ti.
Okwa ti ovanhu otava ka futa oshimaliwa she handukilo ngeenge va hala okupewa oimuna yavo kumuni.
“Oshimaliwa otashi ka futwa osha yooloka, she li kwatela komaludi oimuna ya kwatwa po kumuni. Eendongi odina ondado ya do ya, oikombo nayo otai ka futilwa ondado yayo ya yooloka, osho yoo neengobe ota di ka futilwa nado ondado yado,” Shilongo ta ti.
Okwa kunghulila oshiwana shomomikunda da dingilila odoolopa yaEenhana opo shi kale sha kotokela oimuna yasho efimbo keshe.
Okwa ti elelo lodoolopa ola didilika oimuna hai kala tai li po oimeno modoolopa ngaashi peembelewa, nopomaumbo, omanga oimuna imwe ohai kala ya nangala peembelewa yoo tai nyateke po.
“Ngaashi eendongi odo unene da didilikwa hadi kala mopate oufiku nomutenya, onghee eshi otashi dulu oku eta oshiponga kovashingi,” Shilongo ta ti.
Okwa yelifa ta ti elalakano lokukelela oimuna i kale modoolopa, okukaleka po oukoshoki, nokukelela oiponga yomondjila ei tai dulu oku etwa koimuna.
“Oshiwana na shi topolafane ouyelele ou opo shi kalele okuninga oihakanwa yokufuta oshimaliwa shihapu ngeenge oimuna yasho ya kwatwa po,” Shilongo ta ti.
Okwa ti oshiwana na shi kale talele po ombelelwa yamuni ngeenge shi na omapulo kombinga yekwate po loimuna.