Fourie Nhoni-Shuuya

Ooyene yomikunda yeli omugoyi oyali ya langekwa miilonga melelo lyopamithigululwakalo lyaMbalantu.

Oshituthilangeko shawo osha li sha ningwa oshiwike shazi ko mOutapi, moshitukulwa shaMusati.

Omupopiliko welelo lyaMbalantu Isdor Kanelombe ngoka a eya langeke okwa ti aaleli mbaka oya taamba oshinakugwanithwa oshinene oshoka oya ningi aakongi yomayamukulo mekandulopo lyuupyakadhi kehe wa taalela oshigwana momikunda ndhoka taya ka lela. 

“Oshinakugwanithwa shika inashi talika ko nando shafa showala, oshoka omweshi tambula ko opo mukwathele oshigwana momikunda dheni, nomwa pumbwa okushi ninga noomwenyo adhihe. Okukala omuleli gwopashigwana osha hala kutya owa taambiwa ko onga omukandulipo womikundu nomaipumpomumwe mokati kaantu mboka tolele. Oto talika ko onga omuhanganithi nomukalekipo gwombili momukunda gwoye,” Kanelombe ta ti. Kanelombe okwa ti wo Namibia osho oshilongo moka omitaelo agahe ga taambiwa ko. Onkene okwa pula aaleli mboka opo ya kaleke po oonkulunkedhi, noku pendula po omithigululwakalo dhasimana, ndhoka ngashingeyi tadhi ende tadhi si. Ashike okwa kumagidha wo aaleli mboka opo ya hulithe po oonkedhi ndhoka dhi li kondje yekotampango lyaNamibia. 

“Elelo lyopamuthigululwakalo lyaMbalantu oli wete kutya sho onkalo tayi ende noku lunduluka, omithigululwakalo dhetu noonkulunkedhi otadhi ende tadhi kana po, sho onkalo yoshinanena tayi koko. Ekalekopo lyaashoka shapumbiwa noshili mondjila oshinima oshiwanawa, ashike natu ekelehi oonkulunkedhi ndhoka dha nika oshiponga nenge dhili mepuko, tse tatu tambula ko ehumokomeho momikunda dhetu. Osha simana oku kala aluhe to wilikwa kooveta dhoshilongo nokekotampango, nokomilandu dhomalelo opamuthigululwakalo,” 

Elenga enene lyoshitunda shaMbalantu, Oswin Shifiona Mukulu okwa ti opu na eikwatopomutima tali koko esiku kehe omolwa omaupyakadhi moondjokana dhaagundjuka. 

Mukulu okwa kumagidha aagundjuka opo ya tale noku nongona nawa ngele taya hogolola aakiintu nenge aalumentu yoku ya mondjokana. Okwa ti okwa ndindhilike kutya aagundjuka oyendji ohaya yi moondjokana noku hogolola mboka tya ti nayo mondjokana, taya longitha omatompelo gapuka. Ta ti omolwa omatompelo gapuka oyendji oya taalela omaudhigu moondjokana dhawo. Mukulu okwa kumagidha aaleli yomikunda mwa kwatelwa mboka ya ganithilwa miilonga opo ya kale aagandjimayele aawanawa kaagundjuka. 

Oshinima oshikwao shoka tashi teya po omagumbo osho elongithonayi lyomalomvu mokati kaagundjuka noshowo aakokele moshigwana shetu – Mukulu ta ti. Ta ti aantu ohaya kala unene poondingosho, oshinima shoka tashi hanyeke omahepekathano gomomagumbo, ngoka ga kwatela mo omahepekathano gopalutu nopankalathano, osho wo oku tekula aanona yeli mehalakano. 

Mukulu okwa pandula aaleli ayehe yopamuthigululwakalo oshowo aapanguli naatotiveta, omauministeli, elelo lyoshitukulwa shaMusati, nAambalantu ayehe molwa eitulomo lyawo moku kwathela oshigwana shaNamibia, haye shi ningi ethimbo kehe nonando ya taalela omashongo giili nakulilili.  “Otandi popi nomukumo kutya iipotha 154 yomiipotha 158 momanathano gena sha nekondjelo lyevi, oongamba, nomauthigwa, ayihe konyala oya potokonoka, kakele owala kuitatu yomuyo mbyoka tayi ungaungwa nayo kokakomisi kevi muuministeli womayambulepo goondoolopa niitopolwa yokuushayi.

Fourie Nhoni-Shuuya omunambelewa koMICT