Omolwokukandula po uupyakadhi woopate miitopolwa, ehangano lyoondjila lyoRoad Authority (RA) olya ti olyi li pokutameka okulonga okugwedha ko ondjila yimwe, opo oondjila dhi ninge mbali koombinga akuhe okuza kOmuthiya sigo Oshakati.
Ehangano ndyoka olya popi kutya ondjila ndjoka tayi gwedhwa ko, opo dhi ninge oondjila mbali, otashi ningwa nelalakano lyokukandula po uupyakadhi wothina moondjila, mboka hawu vulu oku eta iiponga yoomoondjila.
Ndhoka okwa li dha popiwa komunambelewa omukuluntu gwehangano lyo-RA Conrad Lutombi.
“Obilliona N$1 oya tengenekelwa okulonga ondjila ndjoka yi ninge oondjila mbali, omanga oomiliona N$400 ga tengenekelwa okulongulula oondjila ngaashi Eengodi oshowo Nehale Lya Mpingana,” ta ti ngaaka.
Ta gwedha po kutya, ondjila ndjoka tayi ka indjipalekwa otayi ka shonopaleka oompito dhiiponga mondjila moka oshowo ekanitho lyoomwenyo.
Ta ti, oondjila dhimwe odhi li monkalo ya nyayika, shoka hashi eta uupyakadhi sho aakwashigwana ya longithe oondjila ndhoka okukagwanitha po oshowo oku ka mona oompumbwe dhakehe esiku.
Omahala ngaashi oosikola oshowo oositola dhiikulya ohaga tetwa ko koondjila dhi li monkalo ya ya nyayika.
Lutombi okwa li wo a pititha kutya ehangano ndyoka lyoondjila olyi na etengenekothaneko lyokulonga ondjila yookilometa 50, koMangeti gokuuninginino, mondjila yaCasablanca-Elavi kongushu yoshimaliwa oomilliona N$70.
“Ondjila ndjoka yu upako yookilometa 50, okuza kOmusheshete okuya kElavi, oyi li metifa okulongwa. Kakwa li ya pu okulongwa omolwomayimbo ga li ga etithwa komukithi goCovid-19,” ta ti ngaaka.
Ta popi kutya iilonga yoopate natango ohayi gandja oompito dhiilonga moshigwana.
Ehangano ndyoka omwenhi gwa yi olya li lya patulula pambelewa opate yOkatana okuyakOngwediva ndjoka ya li ya longwa koshimaliwa shoomilliona N$30.
– vkaapanda@nepc.com.na