OSHAKATI - Oshakati Primary School oya li neyandjo lomapapa oshivike sha dja ko omo ovahongwa va koya po600 va li va mona omapapa.
Omukulunhufikola Agnes Amupolo okwa lombwela kundana kutya ovanafikola vopopilimafikola yaShakati ohava longo noudiinini nohava kala dingi paemhito dihapu.
Amupolo okwa twikila kutya voo ngeenge tava yandje omapapa pofikola yavo ihava ningile ashike ovanafikola, ohava pe yoo ovahongi opamwe novadali ava hava kala ve na oshisho shokuwanifapo eemhumbwe dovanafikola, unene tuu omudali womunafikola dingi.
“Neudo omwaalu weyandjo letu lomapapa oli li pombada shaashi movahongi vetu vakulu va pyokoka neudo omwa wedwa omwaalu wovahongi vape va dja koiputudilo ya yooloka ashike navo ova pyokoka.
Eshi osha etifa ounona vahapu va ninge nawa notwe ke lihanga hatu yandje omapapa okudja 80% shaashi omwaalu ou li pombada, nonade shito ohatutameke po 75%,” Amupolo ta hokolola.
Okwa twikila kutya nonande ofikola tai ningi nnawa ove na omashongo shaashi ofikola oi na ashike fiyo ondodo onhinhatu.
Konima ounona shama vati va mane ondodo onhinhatu ohava tuminwa kofikola i li poushinda yedina Mwadhina Gwanembenge.
Eshi vati ohashi kala shidjuu shaashi ounona vahapu tava di mondodo onhinatu paemhito dimwe ohave lihange inava mona ofikola.
Shikwao natango vati vamwe ohave ke lihanga ve li keefikola dokokule molwa inava mona eenhele pofikola i li oushiinda navo ndele tava tuminwa keenhele di li komakule.
Eshi vati ohashi dulu okukala oupyakadi wakula kovadali ngeenge ounona va tumiwa keenhele di li komakule. Okwa twikila kutya otava indile oministeli i kwafele apa tai dulu opo i dule okutunga eengulu dihapu omo tava dulu okutula ounona.
Okwa ti yoo kutya paife ohava kala yoo ve yadi ounona vahapu ve li mondodo yotete.
Omudali womunafikola dingi mofikola aishe Kristofina Shikemeni okwa ti yee okuudite etumba mokutala okaana kaye ka mona ekopi oshoyo onduba yomapapa eshi ka fiya po ofikola aishe.
Okwa ti yee oha longo noudiinini mokufya oshisho opo a wanife po eemhumbwe adishe dokaana kaye dofikola.
“Omukalo woludi eli owe ka ningila upu opo ka kale hake lihongo noudiinini. Ohandi indile yoo ovadali vakwetu va kale nokufila ounona vavo oshisho opo va dule okuya komesho,” Shikemeni ta ti.