OSHAKATI - Elelo lyondoolopa yaShakati olya tula miilonga ondungethaneko yokuyambulapo omalukanda ngaashi Oneshila, Okandjengedi oshowo Pohamba. 

Mayola gwelelo lyondoolopa yaShakati Leonard Hango okwa ti, elalakano lyokutula omalukanda ngoka ponkatu yondoolopa, okuhumitha ondoolopa yaShakati komeho oshowo oku yi tula pamuthika goondoolopa oonkwawo. 

KOnawa, ngashiingeyi ku na aantu ye vule 3 000. 

“Otwa tembudhila nale omalukanda ga thika pugane kOnawa, ihe natango otu li metifa okutembudhila olukanda Oshoopala kOnawa, ndoka lwa tseyika nawa nedhina Ankambya,” ta ti ngaaka. 

Ta ti, nonando mboka ye li ko otaya nyenyeta kutya inaya hala olukanda ndoka lu tembudhilwe popepi nayo, oshoka olu na oombudhi odhindji, oya ningi onkambandhala oku shi ninga, nomatompelo galwe ga gwedhwa po. 

“Otu li metifa okufaula ko osasiona yopolisi oshowo okapangelo komakwatho gotango. 

Opate ndjoka ya hulila ondjilakati otayi ka tsakanena, opo tu ete omayakulo popepi naakalimo,” Mayola ta ti ngaaka. 

Ta gwedhwa po kutya olukanda Pohamba olwa tulwa nale olusheno kombinga yimwe oshowo omeya. 

Mayola ta ti, okwa hupu ashike omagumbo ngoka taga ka ukililithwa opo ga kale ge li melandulathano ngaashi omalukanda omakwawo ga tembudhilwa kOnawa. 

“Kape na ngoka ta ka tembudhwa, ihe otatu ka tula omagumbo momalandulathano nokufala omayakulo popepi,” ta ti ngaaka. 

Olukanda Evululuko mOshakati olwa tulwa pamuthika gwondoolopa, paife talu ithanwa Extention 15. 

Omukuluntu nomupitithi gwomauyelele melelo lyondoolopa yaShakati Katarina Kamari okwa ti, omalukanda agehe mOshakati, kage na oopolota dhi na uumwene wevi. 

“Moomvula ntano twa taalela otwa ipyakidhila okuyambulapo omalukanda mOshakati, oku ga tula poondondo dhopandoolopa,” ta fatulula ngaaka. 

Ta ti, aakalimo yomomalukanda Evululuko paife oya pewa epitikilo oku ka ninga omayindilo gokupewa oondokumente dhuumwene wevi. 

“Eyindilo ohali ningwa uuna mwene gopolota a futu N$30 mo sikweemeta. Okumona oondokumente dhehala lye,” ta ti ngaaka. 

Kamari okwa fatulula kutya ngaashi ehumokomeho lyu uka komeho nolya fuma ko, oondokumente ndhoka odha simana kukehe omukalimo a li keeyi na, oku mu yambidhidha noompumbwe dha yooloka monakuyiwa. “Otwa li twa ndhindhilike kutya otwa kala nokuyambula po ondoolopa yaShakati komahala hoka ku na aantu ye na iiyemo yi li nawa oshowo iiyemo yi li hwepo,” ta popi ngaaka. 

Ta ti, sho osho ya kutha onkatu ya yambidhidhe oshowo ya yambulepo omahala hoka ku na mboka ye na iiyemo yi li pevi lela nenge kaaye na iiyemo yasha. 

Ta gwedha po ta ti, oye li momusholondondo, onkene kehe olukanda mOshakati otalu ka mona omauwanawa oshowo eyambulepo. 

Kamari ta ti, omalukanda ngaashi ombinga yimwe yolukanda lwaPohamba olwa tulilwa po nale omayakulo gamwe. 

“Otandi kumagidha oshigwana kaashi dhengele wo oombashu momalukando moka, oshoka elelo lyondoolopa olya yalula nokumeta nale lya mana, naashoka otashi shunitha iilonga yelelo monima,” ta popi ngaaka. 

Ta indile aakalimo yomomalukanda moka ya kale taya lopota mboka taye shi ningi. 

Aakalimo yomolukanda Pohamaba mOshakati oya ti, omanga ya lombwelwa kutya itaya ka tembudhwa ngaashi omalukanda omakwawo, oya hala omayakulo agehe ngaashi yakwawo ye ga pewa. Ta ya ti oya hala omeya nolusheno popepi ngaashi yakwawo ya ningilwa mboka ya tembudhilwa kOnawa. 

Sirka Shiyagaya okwa ti omayakulo ngoka oga ningilwa ashike ombinga yimwe yolukanda lwawo. 

“Otwa hala natse tu kale tu li momahala ga tendwa nawa, ge na omeya nolusheno,’’ ta ti ngaaka. 

Cornelia Thobias gomolukanda Pohamba okwa ti, kaye na nando uupyakadhi wokwaatembudhwa, shampa ike elelo lyondoolopa tali ya etele omayakulo popepi. 

Elelo lyondoolopa yaShakati olya kala nokutembudha omalukanda, notali tsikile okutembudha gamwe ngoka ga hupa ko, ihe olya kwashilipaleke kutya, olukanda lwaPohamb italu ka tembudhwa. 

vkaapanda@nepc.com.na