ONGWEDIVA -Kakukutu komatanga opolifi Inspekta General Joseph Shikongo okwa kumaida ovanambelewa vopolifi opo va kale tava kwata nawa oshimaliwa shavo noku shi longifa moinima ya fimana.
Okwa ti ombelewa yaye oya didilika ovapolifi hava kala va tumba oshinyenhu ngeenge ve li koilonga molwaashi ove na eendjo dovanhu noshoyo oimaliwa ya lika po komashima meendingosho. Edi Shikongo okwe di popya oshivike sha dja ko pefimbo kwa li a ninga omutumba novanambelewa vopolifi mOngwediva. Elalakano lomutumba okwa li okutwa ovapolifi omukumo nghee ve na okulihumbata noshoyo okukwashipaleka kutya otava yakula nawa oshiwana.
Lwopokati opo, natango oshivike sha dja ko Shikongo okwa li a ninga omutumba novakwashiwana mOshakati noshoyo ovanangeshefa nelalakano lokukundafana nghene ve na okulwifa oimbuluma noshoyo okukaleka po ekwatafano liwa pokati kopolifi noshiwana.
Moshipopiwa shaye, kakukutu komatanga opolifi okwa popya kombinga yovopolifi vamwe inava panda ngeenge vakwao tava helaelwa moilonga. “Ovapolifi vamwe ohava shangele nge omikanda tava pula va helaelwe neenghatu dipe moilonga. Ovapolifi vamwe ohava kendabala okuya keendudu tava ka konga elao lokuhelaelwa moilonga,” Shikongo ta ti.
Okwa weda po ta ti ovapolifi vamwe ohava nyenyeta tava ti moilonga ova kala mo efimbo lile inava helaelwa ashike ovanyasha va kutwa mopolifi konima yavo otava helaelwa. Onghee Shikongo okwa yelifa ta ti ohashi pula omunhu a longe noudiinini opo a kale a helaelwa ndele omunhu iha yelwaelwa ashike ngeenge mopolifi a kala mo efimbo lile. “Kandi na oshinakuwanifa shokuulika omupolifi kutya okwa pumbwa okuyelwayelwa ashike omukulunhu wopolifi moshitukulwa ile omukulunhu wopolifi poshitaashi oye e na oufemba wokuyadja edina lomupolifi kutya okwa pumbwa okuelahelwa she likwatelela koilonga yaye iwa ta longo moshiwana,” ta yelifa.
Shikongo okwa kumaida yoo vali ovapolifi opo va twikile nnokyakula nawa oshiwana ngeenge tashi ka konga omakwafo opolifi koitaashi.
“Kaleni tamu nyamukula eengodi deni ngeenge tamu dengelwa koshiwana. Xulifei po okulombwela ovanhu kutya itamu longo unene tuu ngeenge ovannhu va pumbwa omayakulo opolifi,” ta ti.
Kakukutu komatanga opolifi okwa ti ovapolifi nava ulike oshihopaenenwa shiwa moshiwana molwaashi ohava longo nokutula po elandulafano nokukaleka po eameno loshiwana.
“Omupolifi ina pumbwa okukala ta kolwa e li meendingosho a djala omudjalo woilonga. Omupolifi ina pumbwa okukala ta kufa ombinga moilonga ya nyika oumbudi ile ta ningile ovanhu omahepeko oukashikekookanhu,” ta ti.Onghee okwa kumaida ovapolifi opo va fimaneke oshiwana, okulihumbata nawa, nokukaleka po eameno loshiwana.
fhamalwa@nepc.com.na