Ooyene yomagumbo oyendji moshilongo, otaya pula opo epangelo lyi ya popile koombaanga opo ku shonopekwe uulethimbo wokufuta omikuli dhomagumbo.

 Oshiwike sha zi ko, ehangano lyaalongithi yombaanga moshilongo, oBankers Association of Namibia (BAN) olya tseyithile egumbo lyopashigwana kutya omumvo gwa yi omagumbo ge li 277, oga kuthwa ko kooyene molwuunyengwi wokufuta ko omagumbo kombaanga.

“Momagumbo ngoka ga kuthwa ooyene, okuza omumvo gwa yi sigo onuumvo, opwa landwa ashike ge li 71 ngoka ga kotha ongushu yoomilliona N$85.9,” ya fatulula ngaaka. Oya gwedha po kutya okuza momasiku 31 gaDesemba 2023, okwa yalulwa aantu ye li 68 414 moshilongo ashihe ya kutha omikuli dhomagumbo ngoka ongushu yago agehe kumwe yi li poobilliona N$50. BAN ta ti oshinima shekanitho lyomagumbo otashi ulike enayipalo lyomaupyakadhi goshimaliwa oshowo eyugo lyoshimaliwa tali ningilwa aantu, tashi pitile mooveta dholwaamambinga, dhi li owala muuwanawa woombaanga.

“Namibia oku na uupyakadhi unene okuyeleka naSouth Africa omolwoshimaliwa oshindji hashi pulwa koombaanga moshilongo shoka hashi gandja wo ethiminiko kiilyo,” taya fatulula ngaaka.  Taya ti okuza mo2010, pokati kaNamibia naSouth Africa, opwa kala pe na eyooloko lyiihohela lyi thike 25bps.

BAN ta gwedha po kutya okupungula moombaanga dhaNamibia oku na ondilo kashona omolwomwaalu gwaantu aashona, eliko lyoshimaliwa eshona, nosho tuu. Komalungula oshigwana osha ningi omasiku tashi indile opo ku ningwe omatalululo nomalundululo gethimbo lyokushunitha oomikuli dhomagumbo, ngaashi naanaa tashi pulwa kuBAN.

“Omagumbo ohaga futwa ethimbo ele unene, omimvo dha thika 20, okuyeleka nomikuli dhiinima yilwe ngaashi iimaliwa niihauto mbyoka hadhi futwa ashike meni yomimvo ntano, nonando kape na eyooloko lyasha,” taya nyenyeta ngaaka.

Oya indile ethimbo lyi shunithwe pevi, nando opomimvo 10 nenge heyali.

Taya gwedha po kutya ethimbo ndyoka ele haya futu, ohaya ka iyadha taya futu egumbo iikando iiyali yomwaalu kwa li ya pewa. -vkaapanda@nepc.com.na