ONGWEDIVA- Oshikondo shounamapya otashi ka ninga oshivilodimbuluko mokuyandja efimaneko kOmupresidente Hage Geingob molwashi naye okwa li omunafaalama.

Oshivilo otashi kalako mongula kendiki lokudeula ovanyasha koRietfontein moshitukulwa shaOtjozondjupa.

Edi oda popiwa komukulunhuwiliki wouministeli wounamapya, omeva nomatulululo omadu Ndiyakupi Nghituwamata momukundapitifi wa pita onghela.

Koshivilo oku ota ku ka kala vali ominista younamapya Calle Schlettwein oo oye omupopi wefiku noshoyo tuu ovanambelewa veendodo da yooloka.

Omelelo eedoolopa, eefikola, eengeleka da yooloka, eembelewa dongoloneya okwe li pyakidila nokuninga oivilodimbuluko yokuyandja efimaneko kOmupresidente Geingob.

Onghee Nghituwamata ota shivi ovanafaalama veendodo da yooloka ve li moshitukulwa shaOtjozondjupa noshoyo ovanafaalama okudilila koitukulwa ya yooloka opo va holoke momwaalu muhapu okuyandja efimaneko komunafaalama mukwao Geingob. 

Okwa ti Geingob okwa li omulumenhu a fimaneka oshikondo shounamapya molwashi okwa kala alushe e hole okuya kofaalama yaye i li kOtavi pefimbo lomafufdo.

“Osha fimana opo ovafaalama va ka yandje efimaneko komunafaalama mukwao shaashi naye okwa li ta kufa ombinga koshikondo shounamapya,” ta ti. – fhamalwa@nepc.com.na