Oshikonga shoka sha tamekwa po okugandja epango lyoshali kanuumvu ye thike po100 000 moshilongo ashihe shedhina ‘Epango Lyoshali lya Dr Shapumba 2023’ onkene tashi pula komeho. 

Oshikonga shika osha totwa po komundohotola Elifas Shapumba, mwene gwendiki lyuuhaku lyopaumwene lyedhina Dune7 Medical Centre, petameko lyomvula ndjika. 

Okwa li sha shimbike pambelwa muJanuali mondoolopa yaWalvis Bay, kuMayola gwaWalvis Bay, Trevino Forbes, ngoka a popi ta ti pethimbo oshilongo sha taalela omashongo gomikithi dha yoololokathana, ekwatho ndika lyo kugandja epango lyoshali okuza kaandohotola yomoshilongo olya taambiwa ko kaaleli oyendji moshilongo ashihe. 

Forbes okwa gandja epandulo komundohotola Shapumba ngoka a kutha onkatu opo a kwathele aamvu mboka ya taalela omikithi dha yoolokathana moshilongo, naashoka oye e li omundohotola gwotango a eta po oshinima shi li ngeyi. 

Omundohotola Shapumba okwa ti, okutota po oshikonga shika osha zi sho a li a mono hekulu anuwa a li a kwatwa komaumvu ga yoolokathana, no kape na shoka kwa li sha ningwa po opo a kwathelwe, omolwomayakulilo gaanuumvu nomiti dha pumba moshilongo. 

“Omakonaakono gokutala uukolele womuntu oga simana noonkondo, naashika ohashi yanda opo aantu ya kwate komikithi dha yoolokathana,” Shapumba ta kumagidha ngaaka. 

Oshitopolwa shotango shoshikonga shika osha tamekele momasiku gahamano gaJanuali 2023, pehala enene lyomangeshefelo lyedhina Dunes Mall moWalvis Bay. 

Aaakalimo yomoWalvis Bay ye thike po587 okwa li ya konakonwa omikithi dha yooloka, mwa kwatelwa etalo lyombinzi ya londa, HIV, osuuka, epango lyoshali osho woo ehungomwenyo. 

Oshitopolwa oshitiyali oshi li metifa, nosha tamekele momasiku gahamano Febuluali omvula ndjika, moka omundohotola e li ta panga aakulupe ayehe mboka ya tulwa momagumbo gaakulupe moWalvis Bay ngaashi, Kuisebmund, HuisPalm nosho woo His House. 

Aakulupe ya adha po35 onkene ya mona epango lyoshali. 

Okuza muMaalitsa oshikonga shika otashi ka tsikila moshilongo ashihe, notashi ka tameka konooli miitopolwa ya yolookathana ngaashi Opuwo, Outapi, Oshivelo, Otavi niitopolwa yilwe mbyoka yi li lela momikunda, manga inaashi taandela kiitopolwa ya yoolokathana mbyoka ya ihanena oshilongo ashihe.