OSHIKUKU - Aakalimo yomOshikuku oya holola enyanyu lyawo sho ya penduka nonkundana ombwaanawa Etine lyoshiwike sha zi ko kutya oya pewa oopolota dhoku tunga omagumbo gawo okupitila mehangano Shack Dwellers Federation of Namibia (SDFN).
Elelo lyondoolopa olya gandja oopolota 23.
Mayola gwondoolopa yaShikuku Julia Endjambi okwa kumagidha oshigwana shilongithe oompito dha fathana naandjoka oku imona omagumbo gawo yene.
“Ehangano ndika otali kwathele okuyambula po noku humitha komeho oshigwana shaShikuku. Otandi pandula omahangano ngoka taga yambidhidha ngashingiika ga tsikile opo oshigwana shi vule okumona omalukalwa gawo yene,” ta kumagidha ngaaka.
Endjambi okwa ti, ehangano ndyoka SDFN ngaashingeyi olya yambindhindha aakalimo yomondoololopa yaShikuku ye li 62 sho ya tula omwaalu kumwe, okumona omagumbo.
Ta ti, ehangano lyoSDFN ohali kwathele kehe ngoka e na iiyemo iishona noshimaliwa shoku tunga shoka haya shunitha muule wethimbo e le, niimaliwa yontumba.
Gumwe go mwaamboka ya mono omahala okwa ti, enyanyu lye enene noonkondo oshoka ethimbo lyokuza moombashu okuya momakuma lyathikana.
“Onduuvite ombili oshoka otandi mono ehala lyandje mwene. Onda dhidhilike kutya aantu oyendji kaayuviteko uuwanwa wehangano ndika, ihe oyetu kwathela lela,” ta popi ngaaka.
Ta ti, kehe ngoka kena ehala lye mwene nenge ta mono iihuna, e li moombashu, ethimbo o paife lyoku konga omagumbo gawo gomakuma, okupitila mehangano ndika.
Omupevi minista gwomapendulepo gwoondolopa nuushayi Natalia Goagoses sho a li a gandja omahala pambelewa mOshakati omumvo gwayi okwa ti, kapena nando omuNamibia gumwe e na okumona iihuna.
“Okuza moombashu ka kuna uuyogoki, aantu otaya vulu okukwata ko mikithi dha yooloka okuza moombashu. Oyendji haya zi moombashu kayena oopomba dhomeya oshowo omalusheno.
Goagoses okwa ti, omagumbo ngoka otaga ka tungwa kiilyo yoSDFN nomayambidhidho okuza ko mahangano Ohorongo Cement, RMB Namibia oshowo Pupkewitz foundation.
-vkaapanda@nepc.com.na