Aletta Shikololo

WINDHOEK – Okutungapo nokuninga omakwatathano pokati kaantu omutenge omudhigu koyendji, ashike ngashiingeyi oshinyangadhalwa sha tseyika nawa nedhina ‘speed dating’ osha galuka noshinyangadhalwa shimwe shoka sha li sha ningwa oshiwike shika pehala lyokuninwa nokulya lyedhina The Kitchen moWindhoek. Oshinyangadhalwa shika hashi ningwa omwedhi kehe osha nuninwa aantu mboka ya hala okutsakanena naantu aape, taya vulu okukala okuume, ookuume kopahole, nenge omuntu ngoka tamu vulu okukala tamu ningi naye omashendjo. Aagundjuka oyendji oya li ya kutha ombinga moshinyangadhalwa shika, shoka sha unganekwa kugumwe gwomaatotipo ‘yospeed dating’ Wilbard Lumbololo osho wo omuunganeki gwiituthi Natangwe Placidus.

Moonkundathana noEntertainment Now! Lumbololo okwa fatulula kutya; “Elalakano okulundulula omukalondjigilile gwokuninga omakwatathano moNamibia nokuyambulapo ontseyo yaantu minima mbika.

Otu uvite kutya ekwatathano ewananwa olyo thimba yi na ongodhi ngele tashi ya konkalamwenyo ombwaanawa, onkene oonkundathana pokati kaakiintu naalumentu kombinga yomakwathanao gopaihole otadhi kwathele ya tothe mo nokudhimbulula oompumbwe dhawo moohole dhawo. Dhimbulukwa kutya kape na omishila, kape na oomwiilwa tadhi hikwa, aantu ashike yaali ye li pamwe yu uvitathane,” ta ti ngaaka.
Opo tu shi ninge oshipu, opwa li uukalata mboka u na omapulo ogendji gopaihole shoka sha li sha pitika aantu ya manguluke sho ya li taya popi kombinga yiinima yilwe yonkalamwenyo opo ya tunge po ekwatathano ewanawa.

Oshiindingili shika osha li shi na iinyangadhalwa oyindji yaagundjuka. Moshitopolwa shotango shopolograma opwa li poshitaafula shomakwatathano gonkalonawa mpoka aakuthimbinga ya li taya kundathana muungundu kutya aakiintu naalumentu ohaya kala naana ya hala shike moohole moka pwa li pwa gandjwa okakoothiwa nokateye koshali osho wo uumbiskiti. Oshitopolwa oshitiyali osha li ooyaali moka aakuthimbinga ya li ya pewa uukalata mboka wu na omapulo gomuule go omadhigu, ngaashi onakuziwa yoye, shoka wa hala monahiya, nosho tuu.

  Shi ikwatelela kaawunganeki yoshiindingili, mbyoka ya zile ko oya li ya enda nawa oshoka aantu oyendji oya li yi itoolele mo ookuume kawo kopahole.