Opolisi moshitopolwa shaKunene oya lopota oshiponga shi nyanyaleka shoka sha faalele oomwenyo dhaantu yane mehuliloshiwike.

Omugandji gwomauyelele gwopolisi moshitopolwa shaKunene Vehaniza Ruiter, okwa ti, ohauto yoToyota Passo oya li tayi hingwa okuza kOpuwo yu uka kOkanguati , sho ya li tayi kambadhala okusineya eloli, nani komeho otaku zi eloli limwe natango.

Otaku hokololwa kutya eloli ndyoka kwa li tali zi komeho okwa li lya kambadhala okuhenuka ohauto ndjoka, nomuhingi okwa li a nyengwa okupangela ohauto, ee tayi idhenge meloli ndyoka nokugwa ko kopate.

Eloli ndyoka kwa li tali zi komeho, anuwa okwa li tali zi komukunda Oruhuna. 

Ta ti, omuhingi gweloli ndyoka anuwa kakwa li nkene a ninge, nando a li a kambandhala okuhenuka, oshoka ohauto oya li ye ya nale moshipala shololi.

 Omuhingi gumwe anuwa okwa teka omagulu agehe oshowo okwaako kokokulyo.

Ruiter okwa ti ohauto ndjoka hayi felefulile kOpuwo, oya li ya humbata aantu ye li yahetatu, yane yomuyo oya hulitha omanga yane taya mono uuhaku moshipangelo oshinene shOpuwo.

Ta ti, mboka ya li meloli, inaya ehama unene. Aakwanezimo oya tseyithilwa.

Opolisi onkene tayi tsikile okukumagidha aahingi yiihauto ya hinge nuukeka opo ku yandwe iiponga yombaadhilila.

Tayi ti, okuhingilila itaku ti okuthika. 

Nonando oto hingi kashona owu na okuthika ashike, omolwegameno lyoomwenyo mwa humbata mohauto osho wo dhayakweni ye li wo moondjila,” tayi kumagidha ngaaka.

Oya gwedha po kutya ngele oshigwana osha landula oompango adhihe dha tulwa po, nena kape na nando uuwinayi washa tau holoka. 

Omwedhi gwa zi ko aantu ye li 57 oya kanitha oomwenyo dhawo moshilongo, ihe iiponga oyindji oya holoka kokwaalandula omadhidhiliko gomondjila omanga yamwe taya hingi omanga ye li kohi yiikolitha.

Opolisi yaNamibia okupitila miikundaneki ya yooloka oya kala nokukumagidha aahingi yiihauto, ya gwanithe po oompango dhomoopate.

-vkaapanda@nepc.com.na