ONGWEDIVA - Oshiwana monooli otashi lilile Omupresidente Hage Geingob komaumbo mefiku lepako molwaashi kape na oyeendifo yokuya koWindhoek.
Ovaleli va yooloka koitukulwa mwa kwatelwa oongoloneya nomalelo opamifyuululwakalo okwa hokolola taa ti onghalo yoshimaliwa oyo unene tai imbi ovanhu moitukulwa va ninge omutumba wokuendela pamwe noshivilopako shaGeingob.
Ngoloneya woshitukulwa shaShikoto Penda Ya Ndakolo okwa ti oshiwana nashi endele ashike pamwe noRadio yoNBC molwaashi otai ka kundaneka oshiwana kombinga yaashi tashi linyenge efiku Geingob ta pakwa.
“Ovanhu vamwe ove na ee-TV omanga vamwe ove na eengodi doshinanena onghee oshiwana nashi longife omikalo da yooloka okuendela pamwe noshivilopako shaGeingob,” Ya Ndakolo ta ti.
Okwa yelifa ta ti ombelewa yaye oya ninga nale oshivilodimbuluko pamufika woshitukulwa sha li mOmuthiya omo oshiwana sha dja koikandjohoololo ya yooloka kwa li sha holoka momwaalu muhapu.
Onghee okwa ti inashi pumbiwa vali okulongekida oshivilo mefiku Omupredidente Geingob ta fudikwa molwaashi osha ningwa nale.
“Otashi pula oshimaliwa shihapu okuninga oshivilodimbuluko oshitivali koikandjohoololo ya yooloka. Otwa longifa nale oshimaliwa pefimbo twa ninga oshivilodimbuko shopashitukulwa,” ta ti.
Omunashipundi welelo loshitukulwa shaMusati Andreas Shintama okwa koleka ta ti oshitukulwa shavo itava ka ninga vali oshivilodimbuluko shitivali onghee okwa kumaida oshiwana opo shi kale shi li mombili mefiku lefudiko laGeingob.
“Ovaleli vahapu mwa kwatelwa ookansela itava kala po molwashi otava kaya kefudiko koWindhoek onghee otashi ka kala shidjuu okuninga oshividimbuluko peha na ovaleli,” Shintama ta ti.
Lwopokati opo, omupopiliko welelo laUkwanyama Andrew Naikaku okwa ti oshivilodimbuluko osho kwa li sha ningwa mEenhana Etitatu osha wana molwaashi okwa li kuhadi oveleli vopamufyuululwakalo.
“Ohamba yelelo laUkwanyama oya yandja nale etumwalaka layo koshiwana pefimbo loshivilodimbuluko shomOhangwena,” ta ti.
Chief Ndilimani Iipumbu welelo laUukwambi okwa ti itashi ulike efano liwa oshiwana sha ngudumana ndele kape na ovaleli.
“Onda yandja nale etumwalaka la kwatelamo omalelo ahetatu opamufyuululwakalo monooli. Onda ya koWindhoek opo ndi ka yandje efimaneko laxuuninwa kuGeingob,” ta ti.