ONGWEDIVA - Omupopiliko wehangano lo-MTC John Ekongo okwa ti ehangano lavo ole lipyakadila nokuyandja omayakulo okushangifa oukalata vomeengodi koikandjohoololo ya yooloka.
Ekongo ta ti oshiwana okwa li tashi lishangifa tashi endelele pefimbo lolweefo lotete lomaishangifo, ashike paife otashi ende shokadi kowishi.
“Eshi omalishangifo a li e na okuxula muDeseba okwa li to hange omikweyo diledile pomandiki a-MTC, ovanhu vamwe opo kwa li hava nangala, ashike nghee omafiku a wedelwa paife ovanhu navo ova mwena,” Ekongo ta ti.
Fiyo opapa ovanhu ve li omiliona 1,4 va fikama po mo72% ova shangifa oukalata vavo, nave dulife po548 000 inava nyolifa natango oukalata vavo.
“Otwa mana onghela okushangifa oukalata kOkankolo onghee nokudja opo ohatu ka ya koshikandjohoololo shaEengodi okutameka momafiku 15 fiyo 17,” Ekongo ta ti.
Okwa weda po ta ti momafiku 19 fiyo 20 otava ka ya koshikandjohoololo Nehale lyaMpingana nomafiku 21 fiyo 22 okoGuinas.
Ta ti elalakano lokuya momikunda oolo okutwala omayakulo popepi noshiwana nokukwashipaleka kutya ovanhu ova shangifa oukalata vavo moule womafiku aa a tulwa po. Paife okwa xupa omafiku e li meni lo40.
“Ookansela nava twikile okushivifila ombelewa yetu kombinga yovanhu va taalela omashongo okushangifa oukalata momikunda,” ta ti.
Okwa weda po ta ti MTC okwa didilikwa ashike ovanhu vamwe tava ende nakashona okuya keenhele dokushangifa oukalata molwaashi tava longo manga momapya.
Onghee okwa indila oshiwana opo shi twikile okuhoka momwaalu muhapu okulongifa omhito iwa yomayakulo va etelwa popepi okushangifa oukalata vavo.
Lwopokati opo, Ekongo okwa yelifa ta ti ngeenge omunhu ina shangifa okakalata kaye otaka kufwa mo momhepo oule weemwedi nhatu nokonima yeemwedi odo, otaka ka tetwa mo filufilu ngeenge natango inaka shangifwa.
Okwa weda po ta ti okushangifa oukalata itashi ti kutya MTC ota ka pwiikina eenghundafana dovanhu ngeenge tava popi mongodi.
“Eshango loukalata kali fi nande oveta ya-MTC, ashike oli li oveta yoshilongo, fiyo ohatu liufa ashike keemhango,” ta ti. Kansela woshikandjohoololo shaGuinas Elias Marithinus okwa ti oshikandjohoololo shaye osho shimwe shi yadi oshiwana shovayelele nokwa pula MTC nge a ninge moule womafiku 10 moGuinas molwaashi omafiku avali inaa wana.
Kansela waKankolo Hans Nambodi okwa pandula MTC eshi a e ta omayakulo okushangifa oukalata momikunda ashike naye ota ti omafiku a yandja omashona noshiwana otashi dulika shi ka kale inashi pwa ko.
-fhamalwa@nepc.com.na