Ohamba yOvakwanyama Martha Mwadinomo yaKristian Nelumbu okwa pula ookansela melongelokumwe noomwene vomikunda opo va didilike ovanhu ovo ihava hala oku longa vaha pewe vali oikulya yoshikukuta.
Nelumbu, edi okwe di popya pefimbo ngoloneya Sebastian Ndaitunga a li eke li lopota kouhamba onga ngoloneya mupe moshitukulwa shaHangwena.
Ohanmba edi oye di popya mokuuda kutya mOhangwena omu na omaumbo eli lwopo 50 000 ena omhumbwe yoikulya.
“Onda hala oku denga omufindo pondjala opo, nopovanhu va kalela eekamba inava hala okulonga. Ava hava penduka vaka lela eekamba voo tave keli shangifa oikulya yoshikukuta kwafei nge vaha pewe oikulya.
Okudja nena ookansele noovene vomikunda nava fye oshisho opo va didilike ovanhu ava ndele tava kala inava pewa okulya, shaashi kavena eshi vahala okuninga,” Nelumbu ta ti.
Okwa twikila kutya natango okwa hala oovene vomikunda va tule po eevili dokupatula oshoyo oku patifa eekamba, opo ovanhu va dule oku kala hava penduka veli momapya.
“Natango onda teelela yoo tu kale tu na ekwatafano lela liwa nolina eenghono, unene tuu ngeenge tashiya pokulela oshiwana nomalunduluko mahapu otae keli monikila,” Nelumbu ta ti.
Ndeitunga okwa ti omaumbo edulife po48 000 oku li momusholondodo waavo va pumba eendja domeendelelo, ashike fiyo opapa omaumbo ashike e li 16 000 a mona ekwafo loikulya.
Ndeitunga okwa ti omaumbo oo a hoololwa mo oyoo ashike e na ondjala yanyaa lela kehonga, oo ashike natango omuna ngaho.
“Moshitukulwa onda hanga mo lela omadjuu mahapu, ashike ondajala oyo oupyakdi wotete nda mona mo, noyapumbwa lela okwafo lomeendelelo,” Ndeitunga ta ti.
Okwa twikila kutya moshitukulwa natango omuna enota lanyaa komunhu, ashike vati ope na eemboola da yandjwa kepangelo ashike inadi wana ovanhu aveshe. Okwa ti ota fi oshisho opo pa etwe vali dimwe odo tadi ka tulwa opo pena omhumbwe yakula.
“Ope na yoo eepoloyeka dokukufa omeva mondobe oyo ya monika koshiyedu, ashike oshina lela ondjila ile. Okwa tengenekwa kutya ngeenge omeva okwa tamekwa oku fipwamo medu kuyele otaa kanuwa ashike mo2025,” Ndeitunga ta yelifa.
Ohamba Nelumbu, oya ti yoo pamwe nelelo laUkwanyama ova tambula ko Ndeitunga moshitunda.
Ndeitunga okwa ti eli halo etalele po laye lotete oku talela po ovawiliki vomoshitukulwa, tete okwa tameka nomupresidende omutivali woshilongo Hifikepunye Pohamba, oshivike shadja ko.