ONGWEDIVA - Ovanafikola ve li meendodo dopetameko moshitukulwa shaHangwena ove li komaumbo molwaashi pehe na ovahongi va wana.
Ovanafikola vamwe ove li meengulu va finana mo molwaashi kape na eefikola kadi na omatungo a wana omanga ovanafikola vamwe ohava longelwa momatala oipeleki.
Omukulunhuwiliki wehongo moshitukukulwa shaHangwena Isak Hamatwi okwa ti mOhangwena aishe omu na ounona veli 330 inava mona ofikola.
Hamatwi okwa koleka yoo kutya oshitukulwa osha taalelwa komhumbwe inene yeengulufikola nosho yo ovahongifikola. Ta ti osho, moshitukulwa shaye omu na ounona vamwe ve li komaumbo omanga ava ve li meetundi, vahapu ova finana mo meengulu.
Okwa ti ombelewa yaye oye lipyakidila nokukandula po omukundu ou, nomoshivike tashi ya ounona ovo otava tameke ofikola.
Hamatwi okwa ti oupyakadi ou owa taalelwa unene kovanafikola okudja pondodo yotete fiyo onhine.
“Keefikola dimwe otwa tuma ko nale ovahongifikola omanga keefikola dimwe otwa pitifa eemhito doilonga opo ovahongifikola va ninge omaindilo oilonga,” Hamatwi ta ti.
Omukulunhuwiliki mouministeli wehongo Sanet Steenkamp okwa ti ombelewa yaye oya pula ovakunhuwiliki vehongo koitukulwa ya yooloka opo va shivifile ombelewa yaye kombinga yeefikola di na ounona ve li komaumbo ile ounona va finana mo meengulu.
“Koitukulwa imwepo kaku na eshongo eli ashike koitukulwa imwepo okwa didilikwa ku na eshongo lounona ve li komaumbo onghee oupyakadi ou otau kandulwa po diva,” ta ti.
Oivike ivali ya pita, omutalelifikola moshikandjolongo Ohangwena Frieda Kashikatu okwa li a lombwela minista yehongo Anna Nghipondoka kutya ofikola Nafidi Primary School oi na ovanafikola 42 ve li momaumbo, omanga Onghala Combined School i na ounona 49, noNdilokelwa Combined School oi na ounona 26 ve li komaumbo shaashi pehe na eenhele. Ta ti ounona aveshe ovo ove li va pumbwa okuya mondodo yotete ashike kape na omhito yomuhongifikola.
Nghipondoka okwa talela po eefikola da yooloka moshitukulwa shaHangwena nelalakano okudidilika omashongo a taalelwa keefikola.
Lwopokati opo, omukulunhuwiliki ta kwafele moshitukulwa shaShana Hilma Nuunyango okwa koleka ta ti mOshana fiyo opapa inamu lopotwa ounona ve li komaumbo molwaashi pehe na ovahongifikola inava wana ile eengulu inadi wana.
“Neudo moshitukulwa shaShana omwa patuluka eefikola mbali dipe adishe di na eendodo dopetameko. Okwa li yoo vali twa pitifa eemhito doilonga domaindilo di li 46 omo ovahangifikola va ninga omaindilo oilonga nova kutwa paife,” ta ti.
Omukulunhuwiliki wehongo moshitukulwa shaShikoto Aletta Eises okwa ti ombelewa yaye fiyo opaife inai lopotelwa kombinga younona ve li komaumbo inava mona ofikola. -fhamalwa@nepc.com.na