ONGWEDIVA - Ounona 57 vondodo yotete moshitukulwa shaShikoto otava ka tameka ofikola momwedi tau ya konima yekuto lovahongifikola.

Omukulunhuwiliki wehongo moshitukulwa shaShikoto Aletta Eises okwa hokolola ta ti ounona ava inava mona onhele shaashi kape na ovahongifikola.

Onghee okwa ti ombelewa yaye oya ninga omutumba Etitatu novanambelewawiliki vehongo opo ku talike nghene taku kandulwa po omukundu ou.

“Otwa kundafana opo tu kale twa kuta ovahongifikola ketameko lomwedi tau ya nokudja opo ounona otava ka tameka ofikola diva,” ta ti.

Eises okwa popya yoo vali kombinga yomashongo ngaashi omhumbwe yomeva keefikola noshoyo eepate dii da uka keefikola.

Neudo, omukulunhuwiliki mounimisteli wehongo Sanet Steenkamp okwa ti ovahongifikola ve dulife 200 otava ka kutwa okulonga eendodo dopetameko.

Okwa ti elalakano okukandula po omukundu wovahongifikola veendodo dopatameko inava wana noshoyo okukwashipaleka kutya ounona ova mona omhito yokuya kofikola.

“Osha fimana ngeenge okaana taka mono ehongo lopetameko molwaashi otashi kwafele okupendula ouluvi wokaana,” ta ti.

- fhamalwa@nepc.com.na