Opolifi otai konakona shibofa shokamatyona keedula 14 vati ka kwatwa onghonga komushiinda shavo.

Oshiningwanima osha ningwa mexuliloshivike kodoolopa Aranos moshitukulwa shaHardap.

Omupopiliko wopolifi omupedu Commissioner Kauna Shikwambi okwa hokolola ta ti omufekelwa okwa ufana okamatyona keumbo laye noku ka kwata onghonga.

Oshiningwanima shikwao, okakadona keedula 15 oka kwatwa onghonga kumushiinda shako mexuliloshivike.

Oshiningwanima osha ningilwa moodolopa Gibeon efimbo lokomatango.

Opolifi oya hokolola tai ti omufekelwa okwa li tafindikile okakadona keumbo ashike manga ve li mondjila omufekelwa okwa nukila noku ka kwata onghonga.

Oonakuninga oihakanwa ova twalwa koshipangelo opo va ka ningilwe omakonakono opaunamiti.

Ovafekelwa aveshe ina kwatwa po onghee omakonakono opolifi otaa twikile.

Ovakainhu otava kumaidwa opo vaha fiye vali ounona voukadona momaumbo novalumenhu molwashi ovalumenhu vopaife ohava kwatwa komhepo yoku ya moixulo nounona vavo.

Ounona voukadona ova ninga oihakanwa yoku va pewa omateelelo kooxe omanga vamwe ohava pewa omateelelo kovamwainamati nokovashiinda.

Onghee opolifi oya ti ounona voukadona kave li vali meameno ngeenge ve li momaumbo lovalumenhu.

fhamalwa@nepc.com.na