Omukeleli womaliko ta indile omhangu i kale ya kwata po omukainhu ou e mu denga nomanghava 

 Omukeleli womaliko ou vati a dengwa nokukwatwa o k a v i d i o k o n i m a eshi a vaka eenghaku mofitola yoStudio mendiki lomangeshefelo muGwashamba mOndangwa ota nyenyeta ta ti ke udite ombili eshi omukainhu umwe ha longo mofitola omo e mu langula nomanghava moshipala. 

“Ovanailonga hava longo mofitola omo inava fimaneka oufemba wange. Ova lengifa nge eshi va kwata nge okavidio ndele tave ka tandaveleke komapandja omalungula.” 

Jonas Simeon weedula 30 a dile komukunda Ongha moshitukulwa shaHangwena okwa hangika neenghaku e di holeka medimo konima eshi umwe womunailonga e mu ningila omapekapeko pefimbo kwa li e uya mofitola omwedi wa dja ko. 

Simeon okwa hololela Kundana ta ti okwa vaka eenghaku shaashi okwa li e li momhumbwe yeenghaku, yee iha mono ondjabi ya wana okulikwafele yemwene nounona vaye vavali. 

“Ihandi vake mo shito mofitola omo, ashike efiku olo onda kwatwa komhepo yokuvaka eenghaku shaashi ohandi kala alushe naame nda hala okukala nda djala eenghaku doludi olo,” Simeon ta hokolola. 

Okwa ti okwa patulula oshibofa nopolifiyaNdangwaopoomukainhu oo ha longo mofitola omo a kale a kwatwa po diva shaashi omukainhu oo ke na oufemba wokukala e mu denga noshoyo oku mu kwata okavidio. 

“Ohandi pula ekwafo keeahende dopaumwene opo di kwafele nge ndi twalwe omukainhu ou komhangu,” ta ti. 

Simeon okwa yelifa ta ti eenghuku odo a vaka odi li pongushu yoshimaliwa N$300 ashike okwa pewa ehandukilo opo a kale a futa N$900 molwaashi a vaka. 

“Paife onda kanifa oilonga yange. 

Onda dengwa, onda kwatwa okavidio, ame onda futa N$900 onghee eshi kasha li pauyuuki,” ta ti. 

Komufala wopolifi mOshana Commissioner Naftal Lungameni Sakaria okwa ti ovanailonga womofitola omo ova ninga epuko lakula eshi ve likufiila oveta vovene yokudenga Simeon. 

“Okwa li ve na okuya kopolifi ndele tava patula oshibofa kutya Simeo okwa vaka mofitola yavo,” Sakaria ta ti. 

Okwa weda po ta ti ngeenge omunhu a vaka oha lopotwa kopolifi ashike iha dengwa kovanailonga womofitola onghee eshi osha puka. 

Eshi a kwatafana naKundana, omukulunhu wofitola yoStudio okwa anya okupopya edina laye ashike naye okwa ti omukuinhu ou hava longa pamwe naye okwa ninga epuko eshi a denga Simeon. 

Okwa yelifa ta ti ova kala ve na ekwatafano liwa Simeon eshi alushe ha kala he uya mofitola yavo okutyatyela ongodi yaye. 

“Simeon otwe mu linekela unene, kakwa li tu shi ngeenge ota vake mo mofitola yetu,” ta ti. 

Haende Kadhila Amoomo okwa ti kashi li mondjila eshi sha ningilwa Simeo shaashi omukainhu ou e mu denga okwa ya kondje yoveta. 

“Ovailonga ova dopa okulandula okatendo oka-8 ke na sha noufemba womunhu. Oufemba womunhu keshe owa pumbwa kufimanekwa nonande omunhu okwa nyona,” Amoomo ta ti. 

Okwa yelifa ta ti ofitola kai na oufemba wokukala ya futifa Simeon N$900 omanga ina holoka momhangu onghee eshi osha puka. 

A kumwifa koshikumungu eshi, e na owino woipambele youfemba womunhu Rosa Namises okwa ti omukeleli womaliko naye omunhu ashike ngaashi ovanhu aveshe onghee kakwa li e na okudengwa ile a kwatwe okavidio. 

Okwa ti Simeon na ye komhangu opo a kale a lopota diva oshikumungu eshi opo omukainhu oo e mu denga a kale a pewa ehandukilo lopaveta diva. 

fhamalwa@nepc.com.na