Ovakulupe komukunda Onaanda moshitukulwa shaMusati ova li va ninga omunyanyo wopambili tava nyenyeta omunailonga mokapoosa kopomukunda wavo oo vati he va lile oimaliwa. 

Ovakulupe ve li mengungo ova nyanya va yuka kopoosa yaNaanda, tava ti ova hala oimaliwa yavo ei vati va lilwa komunambelewa ha longo mopoosa yaNaanda. 

Vati ohava mbaanga oimaliwa yavo, ashike omukainhu oo he va yakula oha vake po oimaliwa yavo imwe.

Omupopiliko wopolifi moshitukulwa shaMusati Ismael Basson okwa tumbula kutya omufekelwa fiyo opapa ina mangwa po natango shaashi kape na oshibofa sha patululwa.

Okwa tumbula kutya ovakulupe moshitukulwa ova didilika vati va kanifa oimaliwa  ihapu momukalo wokutuvukila kopoosa.

“Ovakulupe ova hokolola kutya oimaliwa ei have ya okutuvikila imwe ohai kala youtekulu wavo yopeendjela ya nuninwa oku va kwafa ngeno, ashike ohai kana ashike pehe na enyamukukolo lofaafaa kutya oya ya peni,” Basson ta ti.

Basson okwa kunghilila ovayandji voilonga va kale hava tale nawa ngee tava kutu ovanhu, unene tuu ava hava ongaunga noimaliwa, va fye oshisho alushe kutya otava kufa ovalineekelwa.

Okwa ti yoo ovakulupe ngeenge tava ka tuvikila oimaliwa yavo keepoosa alushe nava ye novanhu ve shi okulesha nove shii omilandu adishe dokutuvikila oimaliwa, opo vehe lihaluke tava kanifa oimaliwa momukalo woludi eli. 

Ope na omapopyo kutya mufekelwa okwa kufwa moilonga pakafimbo, noponhele yaye ope ya umwe e lili.

Kundana okwa ninga eenghendabala okumona omanyamukulo koNampost ashike eengodi davo oda kala ashike tadi kwena, itadi nyamukulwa.