Ovakulupe monooli ova ninga oihakanwa yokukengelelwa oshimaliwa shavo keendudu eshi hava kala tava tulwa mokatoo opo va fute oshimaliwa shihapu.
Omupopiliko wopolifi moshitukulwa shaShana Inspekta Thomas Aiyambo okwa koleka ta ti ombelewa yaye oya lopotelwa oibofa ihapu yovakulupe va ninga oihakanwa yokukengelelwa kondudu yomOshakati omukwashiwana waKenya.
Okwa ti ondudu oyo oi hole unene okukengelela ovakulupe ovo kwa li ovanashilonga molwaashi ovo unene va didilikwa hava futu nawa oshimaliwa shihapu.
Aiyambo okwa ti ondudu oyo oi na oibofa ihamano yovanhu va tulwa mokatoo va patulula omapeko kopolifi moshitukulwa shaHangwena noshoyo ovakulupe vatatu vomOshana va shunifilwa oshimaliwa shavo konima eshi va lopotela opolifi.
“Ondudu oyo ohai kala tai tula ouvidio vovanhu komalungula tava hokolola nokutanga oilonga nghene tai yakula nokukandula po omapyakadi oshiwana. Ovanhu ovo ohava kala tava longifwa kondudu opo i kale ya mona ovanhu tava holoka momwaalu muhapu noshoyo okufutwa oshimaliwa shihapu,” Aiyambo ta ti.
Okwa hokolola ta ti oshivike eshi omulumenhu omukulupe weedula 60 hanga okwa tulwa mokatoo kondudu oyo kwa li tai mu pula a fute oshimaliwa N$400 000 molwaashi vati e na omayoka molutu laye.
Oshiningwanima osha ningwa Omaandaxa keumbo londudu hai di kEkuku mOshakati ya shivika nawa okupitila komalungula.
Okwa koleka ta ti omukulupe ou omunailonga mukulu wetanga leameno okwa ya kondudu molwaashi e na oupyakadi weengobe daye tadi vakwa po.
Aiyambo okwa hokolola ta ti ondudu vati oya pula omukulupe opo a fute N$16 500 ye a dule okukwafelwa eengobe daye diha vakwe po vali.
“Okudja opo ondudu oya lombwela omukulupe kutya oku na omayoka molutu laye a tulwa kovanailonga ovo kwa li ha longo navo nale. Onghee okwa pumbwa okufuta N$400 000 opo omayoka a kufwe mo molutu.
Otaku hokololwa kutya omukulupe ou okwa ya kombaanga opo a ka nane oshimaliwa osho a pulwa.
Ovainalonga hava longele mombaanga ova shivifila opolifi opo i kale ya findikila omukulupe ou molwaashi okwa humbata oshimaliwa shihapu.
“Eshi opolifi ya fika oya ningila omukulupe omshihapulo nokonima omukulupe okwa landulwa fiyo okeumbo londudu.
Okudja opo omukulupe okwa pewa a lye ei loxuxwa inali pya opo vati omayoka a dje mo molutu,” ta ti.
Aiyambo okwa ti okudja opo omukulupe okwa pula ondudu opo i kale ye mu shunifila oshimaliwa N$16 500 yaye noku lombwela ondudu kutya ina hala vali okupangwa molwaashi otai ulike ihe na oshili.
Ondudu oya shunifa oshimaliwa shovanhu moipafi yopolifi ashike kape na oshibofa sha patululwa.
Aiyambo okwa ti omakonakono opolifi otaa twikile opo ondudu i kale ya konakonwa kutya ovanhu vangapi va tulwa mokatoo.
Meenghundafana davo naKundana va ninga Etine, ondudu omulumenhu weedula 40 oya hokolola tai ti inai pula omukulupe N$400 000 ashike oye mu pula N$400.
Onghee ondudu oya ti omukulupe ina uda ko nawa eshi kwa li tava kundafana kombinga yondado.
“Onde mu lombwela kutya otandi dulu oku mu kwafela oupyakadi weengobe daye tadi vakwa po. Okudja opo okwa lombwela nge ta ti oku na oupyakadi molutu laye onghee okwa hala ndi mu pange,” ondudu tai hokolola.
Ondudu oya weda po tai ti oi na ashike oibofa itatu ya lundilwa kovanhu va lopotela opolifi kutya ova kengelelwa kuyo.
“Ovanhu ova hala okukakeka edina lange. Kandi shi ondudu yoipupulu ame onghee onda kwafela ovanhu vahapu ve na omaupyakadi.
Omwedi wa dja ko omukulupe weedula 61 okwa tulwa vati mokatoo kondudu tuu oyo konima eshi kwa li a futifwa oshimaliwa N$116 000 opo a kufwe omayoka molutu pamwe nokaana kaye.
Oshiningwanima osha ningwa momafiku 30 muMei 2023 mOshakati noshibofa okwa li sha patululilwa ondudu oyo.
Omukulupe okwa li a shunifilwa oshimaliwa shaye konima a lopotela opolifi.
Omukainhu weedula 38 okwa shunifwa oshimaliwa shaye N$700 kondudu tuu oyo konima kwa li a tulwa mokatoo.
Omukulupe weedula 64 naye okwa shunifwa oshimaliwa shaye N$138 000 kondudu tuu oyo konima kwa li a tulwa mokatoo.
Opolifi oya kumaida oshiwana opo shi kale sha kotokela eendudu molwaashi eendudu dopaife onde lininga oikengelela.