EEMBOO - Omukulunhu wopolifi moshitukulwa shaHangwena Commissioner Otillie Kashuupulwa okwa kumaida ovalumenhu opo va lopotele opolifi ngeenge tava hepekwa kovakainhu vavo shaashi navo ova ninga oihakanwa yokuhepekwa momaumbo.
Kashuupulwa okwa ti osha fimana ngeenge ovalumenhu tava lopotele opolifi opo ku kelelwe omalimonifo oiponga nomadipaafano.
“Omulumenhu ngeenge okwa loloka okuhepekwa otashi eta e li kufile oveta yokudenga omukainhu waye, onghee eshi sha fimana okulopotela opolifi opo omukundu u kandulwe po diva,” ta ti.
Edi Kashuupulwa okwe di popya Osoondaxa pefimbo a talela po eongalo Eemboo Roman Catholic omo kwa li a ninga omutumba noshiwana nokukundafana nghene oimbuluma ina okukandekwa moshitukulwa shaHangwena.
Commissioner okwa li a enda pamwe novanambelewa vopolifi va yooloka noshoyo omukulunhu wopolifi moshitukulwa shaShana Commissioner Naftal Sakaria.
Ovanyasha, ounona novakulupe okwa li va pewa ehongo nouyelele kombinga yomayakulo opolifi.
Kashuupulwa okwa kumaida yoo oshiwana opo shi kale sha kotokele okatoo unene tuu ovakulupe ve li mopendjela.
“Otwa lopotelwa oibofa ihapu yovakulupe va ninga oihakanwa yokunyekwa oshimaliwa shavo ngeenge tava i kombaanga ile tava dengelwa eengodi kutya ova findana oshimaliwa shonumba. Onghee xulifeipo okuya meenghundafana novanhu muhe va shi ngeenge ta mu i kombaanga,” ta ti.
Okwa kumaida yoo vali oshiwana opo shi longele kumwe nopolifi okukandeka oimbuluma momidingonoko davo. Kashuupulwa okwa ti osha fimana ngeenge oshiwana tashi lopotele opolifi kombinga yoimbuluma pefimbo ile tashi yandje ouyelele kopolifi.
Onghee okwa ti oshiwana na shi kale shina eenomolo deengodi dopolifi efimbo keshe nelalakano lokulopota oimbuluma pefimbo ile okuyandja ouyelele kopolifi.
“Oibofa yomakwatonghonga nai lopotwe pefimbo opo oonakuninga oihakanwa va kale pewa omuyakulo opaunamiti pefimbo noshoyo opolifi i dule okuninga omakonakono noupu,” ta ti.
Okwa ti oshiwana na shi xulifepo okuholeka ovanhu tava longo oimbuluma ile okuholeka ouyelele ngeenge opolifi tai pula.
“Omunhu okwa a menwa ngeenge ta yandje ouyelele kopolifi shaashi edina laye iha li tongwa moshiwana,” ta ti.
Lwopokati opo, Commissioner Sakaria okwa twa kumaida ovadali opo ova tekulile ounona vavo oukriste molwashi ota shi kelele okaana ka ha longe oimbuluma.
“Okaana ngeenge oke na etilokalunga, ka tekulilwa oukriste ita ka kwatwa komhepo yokulonga oimbuluma,” Sakaria ta ti. Pefimbo lomutumba, ovakwashiwana ova ti ka veudite ombili kombinga yovanhu hava longo oimbuluma ashike ohava pewa omhito yokulifutilamo modolongo diva.
Onghee ova ti ovanhu vamwe ohava kala va dja momidingonoko davo tava longo oimbuluma ashike modolongo iha va kala mo konima va kwatwa po.