ONGWEDIVA - Ovalumenhu vane ovo va kala modolongo molwomunyeka kwa homatiwa okudja mo2016, ova monika ondjo. 

Okwa hokololwa Shimwooshili Erastus, Matheus Simon, Shaningwa Simson oshoyo Nestor Kamati va kala mokakuma okudja mo2016 molwaashi vati va ponokela Oneshila Service Station mo2016.

Pefimbo va kwatwa ova hangikile yoo ve na eendjebo mbali deembistoli dihe na eembapila.

Efimbo alishe ovafekelwa ava ova kala va idililwa kodolongo kOmungwelume. 

Vati eemhangu davo oda kala tadi ende kashona shaashi efimbo limwe eehahende ohadi ifaula omhangu, efimbo limwe vati omafiku okuholoka komhangu ohaa kala a undulilwa kokule, vali omukifi woCorona nao owa ete opo oshibofa shi kale tashi undulilwa komesho.

Matheus Simon umwe womovanadolongo okwa hokolola kutya yee pamwe navakwao vatatu kava li va teelela vali okumonika ondjo shaashi ova kala modolongo eedula dihapu inava pwa okupangula. 

Okwa twikila kutya yee pefimbo a li a idililwa kOmungwelume okwa kala nokulandela ovanadolongo vakwao oipakete yeeshi shaashi modolongo okwa li tava file mo ondjala. “Otwa kala ashike hatu li lumwe mefiku, noikando ihapu otwa kala hatu pewa oifima oyo aike ihe na nande omuhoka. Onda ka kwatwa nee kedilaadilo lokulanda oipakete yeeshi, nonde shi ninga oikando ya koya puitatu opo ndi yambidide epangelo. Kakwa li nda teelela vali okumonika ondjo moshikumhungu eshi, noshi uditife nge nai neenghono adishe,” Simon ta hokolola.

Okwa ti yoo kutya modolongo okwa kanifila mo shihapu mokufuta eehaende dihapu ndele ohadi fiye po ashike oshibofa shaye. Okwa weda po yoo kutya okulandela ovanadolongo oshivelelwa nasho oshe mu pula shihapu mondjato.