ONGWEDIVA - Ovanafaalama ava ve lipyakidila noulifilo weengobe oshoyo oinamwenyo ei hai dulu okuyandja oipalwifa ngaashi omashini osho yo omaadi ova pewa oshimaliwa sheemiliona N$200 000.

Oimaliwa ei oya yandjwa ya nuninwa okulanda eetenga dokutula omashini, omashina okukanda, eevenda doinamwenyo, omashina okwooteka, omashina okutopola ombuta nomashini naikwao ya wedwa po.

Ngoloneya woshitukulwa James Uerikua, pefimbo a li ta yandje omushangwahokololo woshitukulwa okwa popya kutya eshi osha ningwa opo shi yandje omhito yokupa ovanafaalama veengobe navo oshimaliwa. Okwa weda po yoo kutya oshitukulwa oshe lihanena ovanafaalama ve na oyuunda yeengobe, notava dulu okuninga oshimaliwa momukalo wa tya ngaho.

Uerikua okwa popya kutya oministeli younamapya oya deula ovanafaalama ve li 3 235, ovo ve lipyakidila nounamapya. Ova pewa yoo  ehongo li na sha nonghalo yomhepo oshoyo nghee ve na okulonga noimeno pashinanena tava longifa oungoba.

 Ava ve lipyakidila nounafaalama weexuxwa mOtjopzondjupa ve li 94 ova pewa omaano oikulya yeexuxwa, omakwafo a dja keendokotola doimuna oshoyo ostoka yokuhapupaleka eexuxwa ya kosha N$249 186.

Oministeli oye lipyakidila nokukonga ovanhu va fika po30 moshitukulwa ovo tava ka deulilwa okulonga nomashina opaungoba. Omashina otaa ka longifwa moikandjohoololo aishe i li moshitukulwa. “Ovanhu ava ve udite va hala okukufa ombinga ovamanguluka okulishangifa shaashi omashiivifo otaa ka xula momafiku 23 July 2023,” ngoloneya ta ti.