Ovanafikola kofikola Oshikuni Primary ve li 176 itava ka ende vali eemhadi kombada ngeenge tava i kofikola molwashi paife ova pewa omapando eenghaku kehangano Never Walk Alone.

Ovanafikola okwa li va hafa unene eshi va pewa eenghaku oshivike sha dja ko pofikola yavo i li momukunda Oshikuni moshitukulwa shaHangwena.

Okwa didilikwa ovanafikola ava kwa li hava ende eemadi kombada alushe ngeenge tava i kofikola nosho yo okutuwa komakia noifidi.

Pefimbo ta yandje eenghaku omutotipo wehangano Never Walk Alone Tim Ekandjo okwa ti elalakano nehangano lavo okuyambidida ovanafikola ve li momhumbwe yeenghaku koitukulwa ya yooloka.

Okwa ti natango otava ka alukila moshitukulwa shaHangwena nomapando eenghaku 2000 tadi ka pewa ovanafikola. “Ohatu lalakanene nokukwashipaleka kutya okaana keshe oka djala eengaku ngeenge ke li kofikola. Ina tu hala ounona tava faula keetundi molwashi vehe na eenghaku,” Ekandjo ta ti. Okwa ti ehangano Never Walk Alone ola totwa momudo 2021 konima eshi kwa li a shakeneka ovanafikola ve li meendodo dopedu tava i kofikola efimbo longula ina va djala eenghaku.

Onghee naashi osha eta opo ndi kale nda tota po ehangano nelalakano lokuyambidida ovanafikola neenghaku 

Okwa weda po ehangano eli oha li yambidida yoo vali ounona ve li momapandaanda vehe na oidjalomwa neenghaku ashike ovanafikola ovo ve li unene oshilalakanenwa shavo shotete.

“Otwa tameka nale okuyandja eenghaku koitukulwa ngaashi Hardap, Omaheke, Kavango West, Kavango East, Khomas noKunene. Onghee natango ohatu twikile noku ya koitukulwa ei ya xupako,” ta ti. Okwa yelifa ta ti neudo ova yandja omapando eenghaku 7850 kovanafikola. “Ohatu lalakanene opo tu kale ngeno twa yandja omapando eenghaku 10 000 kovanafikola keefikola da yooloka,” Ekandjo ta ti. Okwa kumaida ovanafikola opo ve li honge nondjungu noku litulamo moilongwa yavo nosho yo okudulika ovahongifikola vavo. Omukulunhufikola pofikola Oshikuni Primary Aarde Mwoongeli okwa pandula ehangano Never Walk Alone eshi la yambidida ovanafikola neenghaku. “Ovanafikola ova kala hava ende oinano ile ina va djala eenghaku, onghee eenghaku edi ota di ka eta elunduluko la kula kovanafikoa nosho yo oku li tulemo moinyangadalwa yavo yofikola,” ta ti. Omudali e na ounona vatanho Rebecca Valunguma okwa hokolola ngeno ka pa li ehangano loNever Walk Alone, ngeno ounona vaye ina pewa eenghaku. Onghee okwa ti okwa pandula unene ehangalo eshi la yambidida ounona vaye neenghaku molwashi ova okwa li ve li momhubwe. – fhamalwa@nepc.com.na