ONGWEDIVA- Opolifi moshitukulwa shaHangwena oya kwata po ovanafikola vovamati vavatu vokosekundofikola yaDr Abraham Iyambo molwaashi va ti va hangakena nokukwata keenghono okakadona komido 15, oko nako komofikola yavo.
Oshiningwanima vati oshaningilwa mofikola omo efimbo lokonguloshi oivike ivali yapita po.
Omukulunhufikola Hafeni Jeremia okwa lombwela oshifo kundanaki kutya, omutonateli womuhandjo okwa li a didilika okakadona kehe mo momuhandjo onguloshi yefiku loshiningwanima.
Vati okwa ninga onghendabala opo a tale ngeenge ote ka mono pondje yomuhandjo nokwa shakena nako momikala.
Eshi e mu pula apa ali, vati tete okwe mu lombwela kutya okwali keengulu ta pukulula kaume kaye womumati, ashike eshi a pulwa a popye oshili, okwa ka hokolola kutya okwali moixulo novamati vatatu shiheli pahalo laye.
Okakadona vati oka hokolola kutya umwe womovamati okuli kaume kako kopaixulo, nefiku olo okwali veli kunda va shakene. Ashike omumati ponhele yoku uya oye aeke okwa shiva vakwao vavali ovo va kondjifa okakadona noku ya nako aveshe momilele shihe li pahalo lako.
Jeremia okwa hokolol kutya oshiningwanima osho shotete mofikola yavo, no inava mona nale olopota yoludi eli.
“Oshili otwa kumwa neenghono onga ofikola koshiningwanima eshi. Efiku nefiku ohatu xungu ovanafikola vetu eemwenyo shaashi vahapu oshe va ya keemwenyo,” Jeremia ta yelifa.
Okwa ti yoo oshiningwanima otashi ngwangwaneke shaashi ofikola yavo oi na eemhango da kwata moiti, nonghee keshi kutya edundakano eli ole va xutuka ngahelipi.
Okakadona paife vati oka kufwa po pofikola kovakwanedimo vako pofikola, ka ya kofikola imwe. Oka li mondodo onihetatu.
Umwe womovafekelwa vati okwa hangika a wanifa eedula 18, voo vavali vati ove na eedula 17 novali mondodo 12. Ovafeekelwa aveshe ova anyenwa elifutilomo, noshibofa shavo osha undulilwa kuNovemba neudo.
Shinyanyallifa…Ovanafikola vatatu vomoDr Abraham Iyambo ova anyenwa elifutilomo molwa ekwatonghonga lomunafikola mukwao
Efano: Facebook