EPEMBE - Ngoloneya woshitukulwa shaHangwena Sebastian Ndeitunga okwa kumaida ovanambelewa tava longele meembelewa da yooloka opo va yakule nawa oshiwana nokufimaneka ovanhu avashe.
Okwa ti ope na ovanambelewa vamwe hava nyamukula nai oshiwana ngeenge tashi ka konga omayakulo.
Edi Ndeitunga okwe di popya pefimbo a talelela po oshikandjohoololo shaPembe oshivike sha dja ko.
Elalakano lokutalela po Epembe okushakena noshiwana noshoyo okukundafana omashongo a taalelwa koshiwana unene tuu omhumbwe yomeva, eepate nomakwatafano opaungoba.
Ndeitunga okwa li a ninga omutumba noshiwana, okwa li a enda pamwe novaleli va yooloka va dja melelo lopashitukulwa shaHangwena mwa kwatelwa ovanambelewawiliki va dja koikondo ya yooloka.
Okwa ti okwa didilikwa oshikandjohoololo shaPembe sha taalela omashongo a yooloka.
Moshipopiwa shaye ngoloneya okwa ti ombelewa yaye otai ka tula moilonga opo oshikandjohoololo shaPembe shi kale sha tungilwa eemboola domeva molwaashi osha fimana ngeenge ovanhu tava nu omeva a yela.
Ndeitunga okwa popya yoo vali kombinga yovadali inava fimaneka omufyuululwakalo molwaashi unene vopaife ova kanifa outeku.
“Longeni ounona veni outeku shaashi osha fimana ngeenge okaana ke na omikalo. Popyeni nounona veni vaha longe oimbuluma noshoyo vaha longife oingangamwifi noikolwifa,” ta ti.
Okwa kumaida yoo vali oshiwana opo shi kale shi na ombili momikunda noshoyo ekwatafano liwa nopolifi novaleli vopamufyuululwakalo.
Moshipopiwa shaye elenga loshikandjo Etsapa, Alfeus Ndjimba melelo laNdonga okwa pula epangelo opo li tunge eendama domeva opo oshiwana shi dule okuninga oikunino younamapya.
Ndjimba okwa pula yoo vali ombelewa yomukulunhuwiliki wehongo opo i tunge osekundofikola moshikandjohoololo shaPembe molwaashi kamu na osekundofikola.
“Otu na ovanafikola hava ka fikola keesekundofikola di li kokule omanga ovanafikola vamwe ihava tambulwa momihandjo,” ta ti.
Ndjimba okwa popya yoo vali kombinga yoonakulwa vakulu inava pewa omakutu oshimaliwa osho hashi dilile kepangelo.
“Moshikandjohoololo Epembe osho shimwe shi na ovanhu vahapu va kufa ombinga pefimbo loita ashike ihava mono omauwa okudilila kepangelo,” ta ti.
Lwopokati opo, omukulunhuwiliki wehongo moshitukulwa shaHangwena, Isak Hamatwi okwa pula ovadali opo va longele kumwe novahongifikola novakulunhufikola tashi pitile mokuyambidida ovanafikola ve lihonge.
Hamatwi okwa ti omhumbwe yoshimaliwa oyo unene tai imbi ouministeli wehongo u tunge eefikola da wana.