ONGWEDIVA - Omupopiliko wopolifi moshitukulwa shaMusati, Inspekta Anna Kunga okwa ti omunhu keshe ta ka hangika te likoshele mokanaala otaka katukilwa onghatu yopaveta.

 Onghee okwa kunghilila oshiwana opo shi xulife po okulikoshela mokanaala molwaashi osha puka.

Edi Kunga okwe di popya pefimbo va ninga eenghundafana naKundana Etitatu.

Kunga okwa ti opolifi oya didilika oshiwana ha shi kala tashi likoshele mokanaala poluhaela.

Okwa ti unene tuu omikunda ngaashi Omahenene nOmbafi ohapa kala alushe ovanhu va ngudumana tave likoshele mokanaala.

"Itashi ulike efano liwa unene tuu ngeenge ovakulunhu tave likoshele poluhaela va talika kounona.

 "Ovakulunhu ovo kwa li va pumbwa okuulika oshihopaenenwa shiwa kounona," ta ti.

Okwa yelifa ta ti omeva e li mokanaala okwa nuninwa okunuwa kovanhu noimuna noshoyo okulongifwa moikunino younamapya.

Onghee okwa kumaida oshiwana opo shi kale tashi twala omeva komaumbo ngeenge osha hala okulikosha ndele hakulikoshela mokanaala.

"Opolifi otai ka kala tai ningi omapekapeko okutala ovanhu tave likoshele mokanaala," Kunga ta ti.

Okwa weda po ta ti oshiwana nashi kale tashi lopotele opolifi kombinga yovanhu tave likoshele mokanaala.

"Oovene vomikunda nava longele kumwe nopolifi mokukondjifa oimbuluma noshoyo oinima ei inai wapala okulongwa momikunda," ta ti.

Okwa weda po ta ti ngeenge ovanhu tave likoshele mokanaala otashi xwaxwameke ounona va danane omeva.

fhamalwa@nepc.com.na