Omulumenhu weedula 37 okwa tuwa neembele komushiinda shaye e na oudu wopamadilaadilo pefimbo kwa li ta kendabala oku mu kelela aha denge ina nomipini.

Oshiningwanima osha ningwa Etivali momukunda Ankambo moshitukulwa shaShana efimbo lokonguloshi.

Okwa didilikwa ovanhu va ninga oihakanwa yokumonifwa oshiponga ile okudipawa kovanhu ve na oudu wopamadilaadilo momaumbo.

Neudo okwa lopotwa omukulupe weedula 88 a tetaulwa nomakatana fiyo omefyo komutekulu waye e na oudu wopamadilaadilo kOkahao.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti omufekelwa weedula 29 okwa li ta denge ina nomipini.

Okudja opo nakuninga oshihakanwa okwa uda omukulukadi ta kuu nokuya ko keumbo lavo.

Opolifi oya hokolola tai ti omufekelwa okwa ponokela nakuninga oshihakanwa ndele te mutu neembele medimo lwoikando ya yooloka.

Nakuninga oshihakanwa okwa tambulilwa moshipangelo shaNandjokwe ta mono epango lopaunamiti ashike ota ku hokololwa kutya vati oku li monghalo itai nuwa omeva.

Ota ku hokololwa kutya omufekelwa oha denge shito ina ngeenge omiti daye da pwa po noshoyo okupiyaneka ovanhu momukunda.

Vati omufekelwa okwa hangika ashike opo a lekelwa moshipangelo shaShakati kosaala yovanhu ve na oupudu wopamadilaadilo.

Opolifi oya kumaida oshiwana shi na ovanhu ve na oudu wopamadilaadilo opo shi kwashipaleke kutya ovanaudu vavo ovanwa omiti pefimbo molwashi osha nyika oshiponga ngeenge omunhu ina nanwa omiti.

Oshiwana osha kumaidwa opo shi kale alushe tashi lopotele opolifi peifmbo ngeenge she li hanga moupyakadi wokutonatela ovanhu vavo ve na oudu wopamadilaadilo.

fhamalwa@nepc.com.na