Omupresidente Hage Geingob okwa denga omufindo kefimano lounawino neshivonawa oyo ili omidi odo da kwatela po omatanga eameno anakanena. 

Moshipopiwa shaGeingob osho sha leshwa ponhele yaye pefimbo leyandjo leedjapo kovanambelewa vetanga leameno eshi va mana okoosa yoProfessional Qualified Officers’ Course (PQOC) moWalvis Bay mEtitatu, okwa pula oilyo yetanga leameno i ulike omalihumbato osho yoo oukwatya oo tau tumbalekifa etanga leameno laNamibia, osho yoo Namibia ongoshilongo.

“Ongakakukutu keni, inandi hala okuuda ile okumona ovakwaita tave lihumbata nai, ilo tava tula eenghalamwenyo dovakwashiwana moshiponga. 

Omafimbo aeshe, novanambelewa ovo hava lopota kunye moilonga, omwa teelewa mu lihumbate nawa, eshi tamu longo pamwe navakweni, novanghona veni osho yoo ovakwashiwana. 

Onda teelela mu longe oilonga yeni nondjungu, nefimano osho yoo pamukalo,” omutwe woshilongo osho wa yandja elombwelo olo.

Okwa pula yoo oilyo yetanga leameno opo i ulike eshiivo olo tali kwatakanifwa nomunhu a deulwa ye oku na owino moilonga yaye.

 “Owino metanga leameno oshinima shakula osheshi otashi pula ovakwaita va mone ounongo oo tau va kwafa va wanife po oilonga yavo,” Geingob ta ti. 

Okoosa oyo ya longwa oshikando shotete mo-NDF oya tamekele momafiku 23 Apiilili noya ningilwa mokamba yedina Rooikop Military Base moWalvis Bay, hano ya kwata oule woivike 29.
Okwa li ya kwatela mo ovanambelewa ve li 91, va dja koikondo ya yooloka ngaashi ketanga leameno lomomeva, lopedu naali lomewangadjo, osho yoo omatanga eameno onhomenawina.

Wumwe womwaavo ve shi pondola momadeulo aa, Nicolette Mogotsi woketanga leameno lewangadjo oo a popya ponhele yavakwao, okwa popya kutya nonando pwa li omashongo momadeulo, ova longwa oinima ihapu yopaukwaita. 

“Atusheni natu kaleni noshinakuwanifwa shokukaleka po ombili noukumwe moshilongo shetu. Otwa pandula ovahongi vetu eshi kwa li ve litula mo moilonga yavo opo va wanife po omalalakano omadeulo aa,” Mogotsi osho a tumbula osho.  -Nampa