Ehangano lyoRani Group ndyoka lyi na oongeshefa dha tseyika nawa nedhina “Uumini” olya yambidhidha aalongwa ye li 70, noshimaliwa shoomilliona N$1.4, shoku ki igwedhela ko kiiputudhilo yopombanda, oshilongo ashihe.
Omukuluntuwiliki gwehangano ndika, Ali Dharai okwa ti, oya yambidhidha ngaaka oshoka oya ndhindhilike ompumbwe yoshimaliwa yaanona, uuna ya mana osikola yopetameko.
“Elongo oshinima sha simana, nosha pumbwa okusimanekwa. Elongo olyo omagano gongushu ngoka omuntu kehe ta pumbwa okupewa,” ta popi ngaaka.
Dharani okwa popi ta ti, kehe okanona Okanamibia oka pumbwa okumona eyilongo lya kola opo ka vule okulongekidha onakuyiwa yako. Ta ti, oshimaliwa shoka ya gandja otashi ka yambidhidha oyendji okutsikila omailongo gawo, unene mboka ya li taya nyengwa. “Ngaashi naana sha tseyika nawa, oshimaliwa shoosikola dhopombanda ohashi kala oshindji, nohashi vulu okunyengana, noompumbwe dhesiku kehe nadho otadhi pula oshimaliwa,’’ ta popi ngaaka.
Dharani okwa tsikile ta ti, elalakano lyawo okuyambidhidha oshigwana shaNamibia, shi ze ponkatu mpoka shi li opo shi ye ponkatu yimwe okweendela pamwe naantu ayehe.
“Otwa hala aalongwa ya mone eyilongo lya pumbiwa opo ya ka kale aantu ya pumbiwa monakuyiwa, opo oshilongo kaashi ka konge oonkulungu dhimwe kondje yiilongo. Pamukalo ngoka oshimaliwa otashi kalekwa moshilongo,” ta fatulula ngaaka.
Dharani esiku ndyoka okwa ti, oye li ponkatu mpoka ye li nena omolweyambidhidho lyoshigwana, onkene otaya tsikile okugandja moshigwana, unene mboka ye li lela mompumbwe yokuyambidhidhwa.
Ngoloneya gwoshitopolwa shaShana Elia Ilimari okwa li a pandula nokutumbaleka ehangano lyoRani, omolwiilonga ya kala nokulongela oshigwana shaNamibia.
“Ohashi pula omadhiladhilo gongushu oshowo oonkondo opo gumwe a longe ngaashi ehangano ndika lyoRani lya ningi notali tsikile okuninga,” ta popi ngaaka.
Ta ti, omumvo gwa zi ko moshitoplwa shaShana omwa patuluka osikola yookompiyuta ndjoka ya li ya tungwa neyambidhidho loshimaliwa shi thike, poomilliona N$1.6 okuza natango kehangano lyoRani.
Natango ehangano olyo tuu ndika lyoRani, olya kala nokuyambidhidha aanuulema nuutemba oshilongo ashihe.
“Ayihe mbyoka Rani okwe yi ningi omolwolukeno e na noshigwana,” ta pandula. vkaapanda@nepc.com.na