Ovanailonga ve dulife po100 hava longele eengeshefa doRani Group ova nyika okuya moKrismes moukukutu, eshi va kufwa moilonga konima yokukufa ombinga mekangha olo kwa li la ningwa oshivike sha dja ko, mOshakati.
Ongudu yopapolitika yoNamibia Economic Freedom Fighters (NEFF) okwa li i kwetele komesho ekangha tai pula ongeshefa yoRani Group opo i kale ya wedela eendjambi dovanailonga noshoyo okuyandja oilonga tai kalele kovanailonga vayo.
Ovanailonga vati ova kufwa moilonga kehangano lo-EPSN olo li li omupokati kovanailonga novayandji voilonga, nole va kuta okukala tava longele meengeshefa doRani Group.
Eendjabi dovanailonga vati ohadi futwa momavalulilo a-EPSN ye oye nee he va tukulile eendjabi ye ta kufa po yoo.
Ovailonga ova lombwela Kundana tava ti ngeenge omunhu oha kwata ondjabi yoN$2600 ohai tukulwa pokati nehangano lo-EPSN.
Otava nyenyeta tava ti vo ova hala okulongela Rani Group no inava hala omupokati ngaashi EPSN.
“Otwa hala ehangano lo-EPSN la xulifwa po diva molwaashi otali hepeke ovanailonga. Onghee otwa hala ashike okukala hatu futwa oshimaliwa tashi dilile koRani Group pehe na ehangano limwe la wedwa po li tu nyokome oshimaliwa shetu,” omunailonga ta ti.
Ovanailonga otava nyenyeta tava ti ova loloka okufutwa eendjabi dishona, okutukwa kovahona vavo, onghalo yokuhe na oilonga tai kalele noshoyo okuhafutwa oluteima ngeenge va longa eevili da pitilila.
Eshi a kwatafana naKundana, omupopiliko wouministeli woilonga Maria Hedimbi okwa ti fiyo opapa kape na oshibofa sha lopotelwa kouministeli wavo onghee okwa indila ovanhu va kufwa moilonga opo va kwatafane neembelewa douministeli woilonga.
Hedimbi okwa kumaida ovanhu opo va kale tava longifa oufemba wavo pamukalo muwa.
Omukulunhuwiliki woRani group Ali Dharani okwa ti ye ina kufa ovanailonga moilonga.
“Ohandi lalakanene okuliufa koveta nomilandu daNamibia,” ta ti.
Eshi a kwatafana naKundana mwene wehangano lo-EPSN Gottieb Ndjendjela okwa dimina kutya oshoshili ovanailonga ova kufwa moilonga.
“Kashi shi oshiholekwa - oshili ovanailonga ova kufwa moilonga,” ta ti.
Ndjendjela okwa anya okupopya kutya omolwashike ovanailonga va kufwa moilonga, nokwa lombwela omutoolinghundana opo a ka konge etomheno oku a uda ouyelele woshiningwanima.