Kakukutu wopolifi moNamibia Inspector General Joseph Shikongo okwa ti okwa lekelwa mo moshipangelo shaMedi Park Etivali loshivike eshi. 

Shikongo okwa lombwela Kundana Etine ta ti paife oku li monghalo i li nawa noku li keumbo laye mefiloshisho lovakwapata vaye ashike ina tameka oilonga manga. 

Omwedi wa djako momafiku 30 lwopotundi 01h00 Shikongo okwa mona oshiponga eshi otuwa yaye yopaumwene oyo kwa li ta shingi ye lidenga mumwe notuwa oyo kwa li tai di komesho. Oshiponga eshi okwa li sha ningwa mondjila yaNdangwa momukunda Indangungu moshitukulwa shaShana. 

Opolifi oya hokolola tai ti poshiponga opo opa kanena eemwenyo dovanhu vatatu ovo kwa li ve li motuwa Hyundai ei ye li denga mumwe notuwa yaShikongo. 

Ovanhu va xulifa moshiponga ovo Sofia Natangwe Ananias weedula 22, Fransa Pombili Ndengu weedula 27 naStefanus Hafeni Shahafifange Lukas. 

Shikongo okwa kumaida oshiwana opo shi xulife po okutandaveleka ouyelele woipupulu kutya okwa teka, nokukala tashi popi oipupulu kutya oku li koshipangelo kondje yoshilongo. “Ame ondi li nawa ina ndi teka onghee oshiwana ina shi kale sha limbililwa kutya ondi li monghalo iii,” ta ti. Okwa weda po ta ti okwa pandula oshiwana eshi sha kala noku mu tula omailikano onghee okwa ti ota twikile nokuyakula oshiwana ngeenge a veluka. 

“Opolifi noshiwana nashi twikile okulongela kumwe molwifa oimbuluma noshoyo okukala ve na e kwatafano liwa mokuyandjaneka ouyelele,” Shikongo ta ti. 

fhamalwa@nepc.com.na