Ethigathano lyoMiss Universe 2018, olya thigi oyendji taya tsu omazima shoMiss Spain, Angela Ponce, a ningi ondjokonona okukala shilumeipiluka gwotango, ano omukiintu ngoka a li a valwa omulumentu, a kutha oombinga.
“Otandi kutha ombinga methigathano muka oshoka shika osha kala ondjodhi yandje okuza nkene nda li okakadhona okashona,” Ponce osho a lombwele oshikundaneki shoTimes sho kwa li ku na omasiku opo ethigathano li tameke. “Onda hala oku ulukila aakiintu, ooshilume-ipiluka ooyakwetu kutya otaya vulu okuninga kehe shoka ya hala ngaashi okuninga: omulongiskola, omuvali, ndohotola, omunapolitika, nenge ontana dhingi muuyuni.”
Omupya omunene Ponce, okwa kanene mondalaye nokedhingonoko lyaakadhona 20 ina thika ko.
“Aluhe onda kala handi popi kutya sho paife ndi na iilyo yuukiintu hasho sha ninga ndje omukiintu, onda kala aluhe omukiintu okuza kevalo. Onda kala aluhe ndi itala ko kutya ngame omukiintu,” osho a ti ngawo.
Angela María Ponce Camacho, okwa li a valwa mesiku 8 Januali 1991, a valelwa moPilas, shaSpain. Okwa li a valwa onga omulumentu, ya li ya valwa aamati yatatu, ye omutiyali mokuvalwa. Okuza pomimvo ne Angela okwa kala nale e wete kutya ye okwa yooloka kuyakwao nonando ayehe oya li ye na iilyo yuulumentu. Nokuza mpoka opo a tameke ondjila ye ndjoka yali onde yo ondhigu. Ashike okwa li e na eyambidhidho lyofamili ye ndjoka ye mu tsu omukumo. Momumvu 2014, Angela okwa mana omatando agehe ge gowiishitulula a ninge ontana yAmupolo sho a tetwa uulumentu nokutsikwa iilyo valithiyuukiintu nomagundji.
Catriona Gray ethamba lya yambukile koPhilippines olyo lya pewa oshishani shokakadhona okawanawa muuyuni ano Miss Universe 2018. Shika osha ningwa Omaandaha goshiwike shika sho a thigi montsi aakadhona yomipolo dhuukilila nomeho gafa oondago ya zi kiilongo 93 muuyuni.
Omunamimvo 24 mbinzi-mbali a valwa komuFilipina-nomuAustralian okwa undula ponomola yotango Demi Leigh Nel-Peters omuSouth Africa ngoka e ki iyadha puutiyali. Gray oye omukadhona omuFilipine omutine ta mono oshishani shuuyuni. Miss Venezuela, Sthefany Gutiérrez, okwe ya omutitatu, methigathano ndika lya ningilwa moBangkok.
Nonando a li mevi lyaandjawo Sophida Kanchanarin gwaThailand okwe shi pondola ngaa okukala gumwe gwomoontana kamana dhi li omulongo, ihe opo owala a hakele pedhingonoko mpoka.