ONGWEDIVA – Omupedu-minista koshikondo sheemina noikwanghono Kornelia Shilunga, okwa pula ovadali novatekuli vounona opo va longe nelitulemo oku tekulila ounona omikalo voo va shive ongushu yehongo.
Shilunga edi okwe di popya mEtitano kofikola yedina Ehafo Combined School ili moshitukulwa shaHangwena oko a ulikwa opo a ninge kaume kofikola oyo.
Shilunga okwa pula ovadali va longe nelitulomo ta ti outeku wokaana ohau tameke meumbo.
Omupedu-minista ta ti ngee ovadali oveli kwata kumwe nofikola, nonovaleli, otava tungu po omakanghameno oo taa yambidida ovanafikola opo va ye komesho pahongo, noshoyo panghalafano yavo yefiku keshe.
“Moukumwe, ohatu kaleke po onhele omo okaana keshe taka i komesho ko ka hange efikilo lako shifike naanaa peenghono dako dopashito. Ehongo onghee ngaho lili oshapi yoku patulula onakwiiwa ili nawa. Sho osho nee epangelo hali tula oshipambu shalo shinene osho hashii koipumbiwa muvalu yoshilongo, kehongo,” Shilunga ta ti.
Shilunga mokutambula ko oshinakuwanifwa shaye okwa ti okwa didilika kutya ye oku na omafa eli kalekelwa taa dulu oku mu kwafela meyambulepo lofikola oyo. Ta ti otaka longa nelitulemo opo a tule oshinakuwanifwa osho eli neekelelwa moilonga.
“Oshinakuwanifwa shange onga kaume kofikola otashi ka lovelela nokondje yeengaba dofikola shaashi onda itavela meenghono nomelongelokumwe noshiwana. Ohandi ka longa nokuhena edimbuko moku ninga oukaume oo u na oshilonga notauka tya sha kofikola yetu<” Shilunga ta ti.
Omukulunhufikola Nabot Shopati, okwa lombwela Shilunga kuka ofikola yavo oi na eemhumbwe dihapu, ashike oyo tai va hepeke oyomatungo.
Ta ti ofikola oya pumba omuhandjo, oshinyangaoTV yoshinanena, ongadjo yekuma, okapale komudana kounona veli mopre-primary, ongulumambo noshoyo obesa yofikola.
“Ongulumambo, oshinyanga, oluumbo lofikola, eenguludofikola dili nhano, oshoyo etungo eli li na eembelewa -aishe oya tungwa kovakwashiwana. Oshiwana pomudingonoko, osha twa oukunikumwe noku shakeneka epangelo ondjilakati,” Shopati ta ti.
Shopati ta ti oku na omukumo kutya oku ninga Shilunga kaume kofikola oshinima tashi ka eta elunduluko nekwafo olo la pumbiwa kofikola.
Ofikola Ehafo oyo ili momukunda Omutemo, konyala eekilometa 18 monooli-ushilo waShakati, oya totwa po momudo 1966. Mongaha oi na ovanafikola veli 686.