Omukulunhuwiliki mouministeli wehongo lopedu Sanet Steenkamp ota pandula ovahongifikola aveshe moshilongo eshi tava longo nelitulemo nonondjungu mokupatulula ouluvi wounona.
Steenkamp eshi okwe shipopya momukanda pitifi wa nuninwa ovahongifikola mefiku lavo O5 Okotoba, la liko Etivali.
Keshe kodula momafiku 05 Okotoba, ovahongifikola ohava dimbuluka efiku lavo moshilongo.
Okwa ti ovahongifikola ova fimana moshilongo shaashi ohava longo oshilonga sha fimana mokukwashipaleka kutya ounona ova pita nawa oilongwa yavo.
Okwa popya ta ti oministeli yelongo oya pandula unene ovahongifikola eshi vena oshisho nounona vofikola okudja peendodo dopedu fiyo okaana ta ka i koshipupudilo shopombada.
“Ohandi halele ovahongifkola omukumo, eenghono, nelitulemo opo mu twikile nokulonga nawa ovanafikola,” Steenkamp ta ti.
Okwa ti kashipu okulonga nounona veli meendodo dopetameko, ashike ovahongifikola alushe ohava kala ve li tulamo okuyandja ehongo nounongo kovanafikola, opo ovanafikola va kale vena eudeko loilongwa yavo.
“Ovahongifikola ovo ovadali vounona ngeenge veli kofikola shaashi ohava kala tava tonatele ounona vofikola, opo va kale veli meameno la wana,” Steenkamp ta ti.Okwa popya ta ti omudo wa dja ko moshilongo eshi mwa tukuka ombuto yoCovid-19, omo kwa li oshikondo shehongo sha dengwa nai konghalo yoCovdi-19 ashike ovahongifikola ova kala tava longo noudiinini pefimbo lombuto yoCovid-19.
Steenkamp okwa ti ovanhu na va kale tava longele kumwe nghee vena okuyambidida oshikondo shelongo moNamibia.
Okwa pandula yoo vali omahangano opaumwene, nehangano lili le po ovahongifikola eshi a kala nokuyambidida oshikondo shelongo.
“Twikileni nokulonga nondjungu opo mu kale muna omwaalu uli pombada wovanafikola va pita nawa,” Steenkamp ta ti.